Atyraýda 58 jastaǵy muǵalimdi kúıeýi pyshaqtap óltirgen

ATYRAÝ. KAZINFORM — Atyraýda 58 jastaǵy muǵalimdi kúıeýi pyshaqtap óltirgen. Oqıǵa 16 naýryzǵa qaraǵan túni bolǵan.

16 naýryz 03:30 shamasynda polıtsııaǵa turmystyq janjal saldarynan 58 jastaǵy áıel adamnyń qaza tapqany týraly habarlama túsken. Qazir atalǵan derek boıynsha «Adam óltirý» baby boıynsha qylmystyq is tirkelip, sotqa deıingi tergep-tekserý bastaldy.

— 62 jastaǵy kúdikti ustalyp, polıtsııa bólimine jetkizildi. Oqıǵanyń barlyq mán-jaıy anyqtalýda. Tergeý múddesine sáıkes ózge aqparat jarııa etýge jatpaıdy, —dep málimdedi PD baspasóz qyzmeti.

Marqum qaladaǵy mektepterdiń birinde bastaýysh synyp muǵalimi bolyp jumys istegen. Pedagogıka salasynda tájirıbesi mol, bir kezderi mektep dırektorynyń orynbasary qyzmetinde de bolǵan.

Ótken aptada Atyraý qalasyndaǵy mektepterdiń birinde 9-synyp oqýshysy 8-synypta oqıtyn qyzdy úshkir zatpen jaraqattaǵan edi.