Atyraýda 56 jastaǵy er adamnyń ólimine sebepshi bolǵan kúdikti buryn da qylmys jasaǵan

ATYRAÝ. KAZINFORM – Atyraýda 56 jastaǵy er adamnyń ólimine sebepshi bolǵan kúdikti buryn da qylmys jasaǵan. Soǵan baılanysty sot úkimimen kúdiktiniń bas bostandyǵy 3 jyl 6 aıǵa shektelgen. Bul týraly Atyraý oblystyq sotynyń tóraǵasy Muhtar Parmenovtiń Kazinform tilshisiniń saýalyna oraı joldaǵan jaýabynda jazylǵan. 

«Atyraý qalasynyń №2 sotynyń 2020 jylǵy 18 maýsymdaǵy úkimimen M.A. QR Qylmystyq kodeksiniń 106-babynyń 1-bóligimen (Densaýlyqqa qasaqana aýyr zııan keltirý) sottalyp, oǵan 3 jyl 6 aı merzimge bas bostandyǵynan shekteý jazasy berildi. Bul jaza sottalýshyǵa kináni moıyndaý týraly protsestik kelisim sheginde taǵaıyndaldy. Jaza taǵaıyndaý barysynda sottalǵannyń jazasy men qylmystyq jaýaptylyǵyn jeńildetetin mán-jaı retinde shyn júrekten ókingeni men asyraýynda jas balalarynyń bolǵany tanyldy. Al, jazany aýyrlatatyn mán-jaı anyqtalmady», - dep habarlady Muhtar Parmenov. 

Onyń aıtýynsha, Atyraý qalalyq probatsııa qyzmeti raqymshylyq jasaý týraly zańyna baılanysty negizgi jazany óteý merzimin qysqartý týraly usynyspen sotqa júgingen. 

«Atyraý qalasynyń №2 sotynyń 2022 jylǵy 20 qańtardaǵy qaýlysymen Atyraý qalalyq probatsııa qyzmetiniń usynysy qanaǵattandyryldy. Sot úkimimen sottalǵan M.A.-nyń ótelmegen jazasy «Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» Zańynyń 3-baby 3-bóliginiń 1-tarmaǵyna sáıkes 7 aı 18 kúnge qysqartyldy. Keıin sottalýshy bas bostandyǵyn shekteý jazasyn óteýden shartty túrde merziminen buryn bosatý týraly ótinishhatpen sotqa júgindi. Atyraý qalasynyń №2 sotynyń 2022 jylǵy 26 shildedegi qaýlysymen sottalýshynyń ótinishhaty qanaǵattandyrylyp, bas bostandyǵyn shekteý jazasynyń ótelmegen merzimi 7 aı 27 kúndi odan ári óteýden merziminen buryn shartty túrde bosatyldy», - dep málim etti Muhtar Pármenov. 

Eske sala ketelik, budan buryn Atyraýda janjal kezindegi kisi ólimine qatysy bar kúdikti qamaýǵa alynǵanyn jazǵan edik.