Atyraýda 56 jastaǵy er adamnyń ólimine sebepker bolǵan kúdikti 8 jylǵa sottaldy

ATYRAÝ. KAZINFORM – Atyraýda jurttyń kózinshe er adamdy uryp, densaýlyǵyna qasaqana aýyr zardap keltirgen kúdikti ustalǵan edi. Sot úkimimen kúdikti 8 jylǵa sottaldy.

Bul oqıǵa maýsymda Atyraý qalasyndaǵy «Dına» bazarynyń mańynda bolǵan. Kúdikti jurttyń kózinshe 56 jastaǵy er adamdy sabady. Keıin zardap shegýshi kóz jumdy. 

Atalǵan qylmsytyq is Atyraý qalasyndaǵy №2 sotta qaraldy. Aıyptalýshyǵa QR Qylmystyq istiń 106-babynyń 3-bóligimen (Abaısyzda jábirlenýshiniń ólimine ákep soqqan, densaýlyqqa qasaqana aýyr zııan keltirý) aıyp taǵylǵan. 

– Jaz aıynda jábirlenýshi qaladaǵy bazardyń aýmaǵynda óziniń júk avtokóligimen qasynda turǵan jeńil avtokólikke zaqym keltirgen. Sottalýshy, jeńil avtokóliktiń ıesi buǵan ashýlanyp, jábirlenýshiniń basyna judyryǵymen birneshe soqqy jasaǵan. Alǵan jaraqatynyń saldarynan jábirlenýshi oqıǵa ornynda qaıtys bolǵan, -dep habarlady oblystyq sottyń baspasóz qyzmeti.

Prokýror sottalýshyǵa 8 jyl merzimge bas bostandyǵynan aıyrý túrindegi jazany taǵaıyndaýdy, azamattyq talapty ishinara qanaǵattandyrýdy usyndy.

Al jábirlenýshi tarap sottalýshyǵa qatań jaza taǵaıyndap, azamattyq talapty qanaǵattandyrýdy surady.

Sottalýshy kinásin moıyndady. Alaıda jábirlenýshini óltirý nıeti bolmaǵanyn, osyǵan baılanysty jeńil jaza taǵaıyndaýdy ótingen. Qorǵaýshylar sottalýshynyń áreketin QR Qylmystyq kodekstiń 104-babymen (Abaısyzda qazaǵa ushyratý) keri saralaýdy surady. 

Sottalýshynyń kinási jábirlenýshi ókiliniń jaýaptarymen, zattaı dáleldemeler bolyp tanylǵan beınejazbalarmen jáne basqa da is materıaldarymen dáleldengen. 

– Sottalýshynyń asyraýynda jas balalary bar. Bul qylmystyq jaýaptylyq pen jazany jeńildetetin mán-jaılar retinde tanyldy. Jazany aýyrlatatyn mán-jaılar anyqtalmady. Sot úkimimen sottalýshy aıyp taǵylǵan bapta kózdelgen qylmysty jasaǵany úshin kináli dep tanyldy. Oǵan 8 jyl merzimge bas bostandyǵynan aıyrý jazasy taǵaıyndaldy. Moraldyq zalaldy óteý týraly azamattyq talap ishinara qanaǵattandyryldy, -dep málim etti sottyń baspasóz qyzmetinen.

Sot úkimi zańdy kúshine engen joq.

Eske sala ketelik, buǵan deıin Atyraýda janjal kezindegi kisi ólimine qatysy bar kúdikti qamaýǵa alynǵanyn jazǵan bolatynbyz. 

Keıin kúdiktiniń buryn da qylmys jasaǵanyn habarlaǵan edik.