Atyraýda 54 jastaǵy er adamnyń quldyqta bolǵany ras pa - polıtsııa jaýap berdi
ATYRAÝ. KAZINFORM – Atyraýda er adamnyń quldyqta bolǵany jaıly derek rastalǵan joq. Polıtsııa qyzmetkerleri áleýmettik jelide taraǵan aqparatqa senbeýge shaqyrdy.
Bul týraly aqparat áleýmettik jelide, keıbir telegram arnalarynda tarady. Alaıda jergilikti polıtsııa qyzmetkerleri onyń quldyqta bolmaǵanyn anyqtady.
– Atyraý oblysynyń polıtsııa departamenti áleýmettik jelide taraǵan derekke qatysty monıtorıng júrgizip, jedel anyqtaý-tekserýdi qolǵa aldy. Sonyń nátıjesinde 1971 jylǵy er adamnyń esh jerde májbúrli túrde nemese quldyqta bolǵany rastalmady. Polıtsııa qyzmetkerleri atalǵan azamattyń turǵylyqty meken-jaıyna baryp, týystarymen áńgimelesti. Áleýmettik jelide taralǵan aqparattyń jalǵan ekeni belgili boldy, -dep habarlady departamenttiń baspasóz qyzmeti.
Eske sala ketelik, buǵan deıin Atyraýda áıeldiń ólimine baılanysty qylmystyq is qozǵalǵanyn jazǵan bolatynbyz.
Keıin Atyraýda 46 jastaǵy áıeldi óltirgen kúdikti qamaýǵa alynǵanyn habarlaǵan edik.
