Atyraýda 5,1 myń gektar jer memleketke qaıtaryldy

ATYRAÝ. KAZINFORM — Atyraý oblysynda jyl basynan beri jalpy aýmaǵy 5,1 myń gektar bolatyn 13 jer ýchaskesi memleket menshigine qaıtaryldy. 

Onyń ishinde 4,5 myń gektary jaıylymdyq jer bolsa, 0,6 myń gektary ózge maqsattaǵy ýchaskelerge jatady.

Atyraý oblystyq aýyl sharýashylyǵy jáne jer qatynastary basqarmasynyń málimetinshe, óńirde paıdalanylmaı jatqan 40 myń gektar aýyl sharýashylyǵy jerin qaıtarý josparlanyp otyr. Qazirgi tańda bul jumys kezeń-kezeńimen júzege asyp jatyr.

— Jer resýrstaryn tıimdi paıdalaný maqsatynda ýchaskelerdi bólý jumystary da júrgizilýde. Atap aıtqanda, konkýrs arqyly jalpy kólemi 11,9 myń gektar bolatyn 32 jer ýchaskesi tabystalsa, aýktsıon arqyly 9,1 gektar bolatyn 7 ýchaske berildi, — dedi basqarmanyń bólim basshysy Nazken Ýteshova.

Mamandardyń sózinshe, bul is-sharalar jerdi tıimdi ıgerýdi qamtamasyz etip, aýyl sharýashylyǵy salasynyń damýyna oń áserin tıgizedi.

Buǵan deıin Atyraý qalasynda 144 myńnan asa adam jer kezeginde turǵanyn jazǵan edik.