Atyraýda 500-ge jýyq ınternet-alaıaqtyq deregi tirkeldi

ATYRAÝ. KAZINFORM — Atyraý oblysynda jyl basynan beri 500-ge jýyq ınternet-alaıaqtyq qylmysy tirkeldi. Bul týraly oblystyq polıtsııa departamenti habarlady. 

Vedomstvo málimetinshe, alaıaqtar azamattardy aldaýdyń birneshe keń taralǵan tásilderin qoldanady. Atap aıtqanda:

• Jalǵan onlaın saýda — tanymal saıttar men áleýmettik jelilerde taýar satqan bolyp, aldyn ala tólem alyp, keıin baılanys úzedi;
• Bank qyzmetkeri bolyp habarlasý — jeke derekterdi (SMS-kod, karta nómiri, CVV) aldap alady;
• Fıshıngtik siltemeler — jalǵan saıttarǵa kirgizip, jeke málimetterdi urlaıdy;
«Investıtsııalyq joba», «Joǵary tabys» ýádesi — jyldam paıda usynyp, qarajatty ıemdenip, joq bolady;
• Messendjerler arqyly aldaý — tanystardyń akkaýntyn buzyp, olardyń atynan aqsha suraıdy;
• Jalǵan jumys usynystary — tirkeý ne qujat úshin tólem talap etedi;
• Qaıyrymdylyq atyn jamylý — naýqas balalardyń nemese jalǵan qorlardyń atyn paıdalanyp, qarajat jınaıdy.

Osyǵan baılanysty óńirlik polıtsııa departamenti azamattarǵa beıtanys tulǵalarǵa jeke derekterin bermeýdi, kúdikti siltemelerge ótpeýdi jáne ońaı olja ýádesine senbeýdi eskertedi.

Buǵan deıin, ınternet alaıaqtyqtyń jańa túri — kólik urlaý týraly jazǵanbyz.