Atyraýda 50-den astam lıftini aýystyrý kerek
ATYRAÝ. KAZINFORM — Atyraýdaǵy 50-den astam lıftti aýystyrýǵa byltyr 1,1 mlrd teńge qarjy bólinbeı qalǵan. Al kópqaqabatty úıdiń turǵyndary lıftke kirgen saıyn jandaryn shúberekke túıedi.
Atyraý qalasyndaǵy B.Amanshın kóshesinde ornalasqan 72,74 úıdiń turǵyndaryna bul másele jaqsy tanys. Aıtýlarynsha, 9 qabatty úıdegi jedel satynyń júrgeninen turǵany kóp. Ádette baspaldaq arqyly kóterilýge májbúr. Al lıft istep turǵan jaǵdaıda dirili júrekke qorqynysh uıalatady. Tipti, mundaǵy temir mehanızmniń eskirgeni sonshalyq jaqynda órt shyǵypty. Al qosalqy bólshekterin turǵyndar óz qaltasynan qomaqty qarjyǵa aýystyrýǵa májbúr bolǵan.
— Bul úı paıdalanylýǵa 2006 jyly berilgen. Lıft sol kezde qondyrylǵan. 20 jyl boldy. Kúnara jasamaıdy. Lıft esigine qysylyp, jaraqat alǵan jaǵdaılar da boldy. 2024 jyly osy másele boıynsha qalalyq ákimdikke aryz jazdyq. Ákimdiktiń bergen jaýaby boıynsha modernızatsııa ótkizý kerek. Turǵyndardyń 75 paıyzy kelisý kerektigin aıtty. Turǵyndar tarapynan biz qajetti qujattyń bárin jasaqtadyq. Odan keıin keri baılanysqa shyqpady. Sońǵy ret baılanysqanda «respýblıkalyq bıýdjetten aqsha bólingen jaǵdaıda aýystyramyz» dep jaýap qatty, — dep máseleniń mán jaıyn túsindirdi turǵyn Raıfolla Bıjanov.
Tehnıkalyq talapqa sáıkes, lıftiniń qyzmet etý merzimi — 25 jyl. Biraq turǵyndar bul qos úıge áýel bastan eski jedelsatylar ornatyldy dep otyr. Muny qalalyq TÚKSh jáne turǵyn ınspektsısy bóliminiń qyzmetkerleri de rastady. Alaıda jóndeý jumystarynyń qashan júrgiziletini týraly naqty málimet bere almady.
— Qulap ketetindeı jaǵdaı bolsa ǵana aldyn alamyz. Al eger qosalqy bólshekterin aýystyrý kerek bolsa, bul jumysqa ákimdik aralaspaıdy. Óıtkeni, lıft — turǵyndardyń ortaq múlki. Olar aqsha jınap, ózderi aýystyrý kerek. Lıftterdi aýystyrýǵa jergilikti bıýdjetten aqsha qaralmaıdy, barlyǵy respýblıkalyq bıýdjetke baılanysty bolyp otyr. Qazir modernızatsııa boıynsha josparymyzda atalǵan eki úı tizimde bar, — dep pikir bildirdi Atyraý qalalyq TÚKSh jáne turǵyn úı ınspektsmııasy bóliminiń sektor mamany Medet Shapkırov.
Turǵyndar lıfttiń jumysyn úılestirýge, ıaǵnı kútip-ustaý úshin «Atyraý Lıft» mekemesine qarjy tóleıdi. Bir sózben aıtqanda, arnaıy karta arqyly kóterilip túsedi. Qazirgi ýaqytta qaladaǵy kópqabatty úılerdiń basym bóligindegiler jedelsatylar osy júıe arqyly jumys isteıdi.
Byltyr qalalyq TÚKSh jáne turǵyn úı ınspektsııasy bólimi 90 kópqabatty úıdi jańǵyrtýdan ótkizý úshin joba jasaqtap qoıǵan. Onda 50-den astam lıftini aýystyrý kózdelgen. Olar «Nursaıa», «Almagúl» yqsham aýdanynda jáne Sátbaev, Jarbosynov, Taımanov jáne Kantsev kóshesinde ornalasqan kópqabatty úılerdi qamtıdy. Mamandardyń sózinshe, qazir naryqta bir lıftiniń baǵasy 21 mln teńge shamasynda.
Byltyr ákimdik bul jumys úshin 1,1 mlrd teńge qajet bolyp, respýblıkalyq bıýdjetke suranys jibergen. Alaıda qoldaý tappady. Jalpy jergilikti atqarýshy organ lıftterdi modernızatsııalaý jobasy arqyly aýystyryp nemese jóndep beredi. Turǵyndar bul jumystyń qunyn birneshe jyl aı saıyn bólip tóleıtin bolady.
Atyraý oblysy ákiminiń orynbasary Qaırat Nurtaev osy máselege qatysty pikir bildirdi. Ol byltyr respýblıkalyq bıýdjetten qajetti qarjynyń bólinbeı qalǵanyn rastap, bıyl osyndaı jaǵdaı qaıtalansa, qajetti aqshany jumysqa jergilikti qazynadan qarastyramyz dedi.
— Shyny kerek bul jumys jyldyń aıaǵyna deıin sozylyp, ókinishke qaraı qoldaý tappaı qaldy. Qazir bul baǵytta áriptestermen sóılesip, jumystanyp jatyrmyz. Bıyl 37 úıdi modernızatsııalap, lıftin aýystyramyz. 21 lıftige jobamyz daıyn tur, — dedi Qaırat Nurtaev.
Qazir qalada 179 úıde 560-tan astam lıft bar. 2024 jyly qalalyq ákimdik 9 lıftini jóndegen.
Eske salaıyq, ótken jyly Astanada jóndeý kezinde lıft qulap, bir jumysshy kóz jumǵan edi.