Atyraýda 50-den astam dúńgirshek zań talaptaryn saqtamaı jumys istegen
ATYRAÝ. KAZINFORM – Atyraýda jyl basynan beri kókónis pen jemis-jıdek satatyn dúńgirshekterge júrgizilgen monıtorıng barysynda 50-den astam zań buzýshylyq anyqtaldy.
Qalalyq kásipkerlik jáne aýyl sharýashylyǵy bóliminiń málimetinshe, arnaıy jumys tobynyń quramynda ákimdik, polıtsııa, memlekettik kirister basqarmasy, Kásipkerler palatasy jáne qalalyq máslıhat depýtattarynyń ókilderi bar. Olar saýda oryndarynyń zań talaptaryn saqtaýyn turaqty baqylap keledi.
Mamandardyń aıtýynsha, anyqtalǵan zań buzýshylyqtardyń basym bóligi abattandyrý qaǵıdalaryn saqtamaýǵa qatysty. Keıbir kásipkerlerge eskertý berilse, birqataryna 86 500 teńge kóleminde ákimshilik aıyppul salynǵan. Al zańsyz saýdamen aınalysqandarǵa 10 aılyq eseptik kórsetkish mólsherinde aıyppul qarastyrylǵan.
Sonymen qatar monıtorıng toby áleýmettik mańyzy bar azyq-túlik taýarlarynyń baǵasyna da baqylaý júrgizedi. Qazir qaladaǵy 13 saýda núktesinde «Atyraý» áleýmettik kásipkerlik korporatsııasynyń ónimderi satylyp jatyr. Eger mundaı ónimderge belgilengen 15 paıyzdyq saýda ústemesi asqan jaǵdaıda turǵyndar dálelderin qosa tirkep, oblystyq saýda jáne tutynýshylardyń quqyqtaryn qorǵaý departamentine shaǵym túsire alady.
Departament málimetinshe, bıylǵy alǵashqy alty aıda júrgizilgen tekserý kezinde áleýmettik mańyzy bar taýarlarǵa belgilengen saýda ústemesin asyrý faktileri tirkelmegen. Alaıda baǵanyń kórsetilmeýi men satyp alýshyǵa fıskaldyq chektiń berilmeýi sııaqty zań buzýshylyqtar áli de kezdesedi.
– «Іshki saýda qaǵıdalaryn bekitý týraly» buıryqqa sáıkes sórede taýardyń ataýy, ólshem birligi, salmaǵy jáne baǵasy teńgemen mindetti túrde kórsetilýi tıis. Bul talap saqtalmaǵan jaǵdaıda Ákimshilik quqyq buzýshylyq týraly kodekstiń 193-4-baby boıynsha ákimshilik jaýapkershilik qarastyrylǵan. Bıylǵy alty aıdyń qorytyndysymen departament 95 kásipkerlik sýbektisine qatysty hattama toltyrdy. Sonyń ishinde sórelerde baǵanyń bolmaýyna baılanysty 76 kásipkerge aıyppul salyndy. Bul kórsetkish ótken jylmen salystyrǵanda tórt ese artty, – dedi departamenttiń bas mamany Gúlaıhan Nursultanova.
Qazir Atyraý qalasynda kókónis pen jemis-jıdek saýdasymen aınalysatyn 126 dúńgirshek jumys isteıdi. Jalpy jergilikti ákimdik mundaı qyzmetke arnalǵan 230 saýda ornyn belgilep qoıǵan.
Buǵan deıin ShQO-da azyq-túlik baǵasyn negizsiz kótergen 50-ge jýyq kásipker jaýapqa tartylǵanyn jazǵan edik.
