Atyraýda 5 jylda taýarlyq gazdy tasymaldaý tarıfi úlken ózgeriske ushyraýy yqtımal

Tarıf jyl saıyn ózgerýi múmkin

Fılıal usynǵan joba boıynsha, gaz tasymaldaý tarıfi aldaǵy bes jylda kezeń-kezeńimen ósýi múmkin. Atap aıtqanda, 2027 jyly 1 000 tekshe metr úshin shekti tarıf 9 202,14 teńge, 2028 jyly 10 479,97 teńge, 2029 jyly 12 147,61 teńge, 2030 jyly 12 779,51 teńge, al 2031 jyly 12 937,25 teńge usynylǵan. Jalpy aldaǵy 5 jyldaǵy jalpy ósim 11520 teńgeni quraýy yqtımal.

Jobada 2027–2031 jyldar kezeńine arnalǵan tarıftiń shekti deńgeıi 11 520 teńge dep kórsetilgen. Bul kórsetkish pen jekelegen jyldarǵa usynylǵan tarıfterdi ajyrata qaraǵan jón.

Qoǵam belsendisi shyǵyndardy qaıta qaraýdy usyndy

Jarııa tyńdaýǵa qatysqan qoǵam belsendisi Baljan Dosmuhambetova tarıftik smeta jobasyndaǵy keıbir shyǵyndardyń birneshe ese óskenine nazar aýdardy. Onyń pikirinshe, shyǵyndardyń bir bóligin qaıta qarap, azaıtý qajet.

– Mekeme kólikterdi jalǵa alýdy toqtatyp, olardy óz menshigine satyp alýy kerek dep esepteımin. Tutynýshylar kólikti jalǵa beretin basqa kompanııanyń shyǵynyn da tarıf arqyly ótemeýi tıis, – dedi ol.

Fılıaldyń tarıftik smetasynda 2027–2031 jyldarǵa kólikti jalǵa alýǵa 1,72 mlrd teńge qarastyrylǵan. Bul shyǵyndar da usynylǵan tarıfti esepteý kezinde eskerilgen.

Qoǵam belsendisiniń aıtýynsha, mundaı shyǵyndardy qaıta qaraý tutynýshylarǵa túsetin tarıftik júktemeniń negizsiz ósýine jol bermeýge kómektesedi.

Investıtsııalyq baǵdarlamaǵa 23,5 mlrd teńgeden astam qarjy qajet

Fılıal 2027–2031 jyldarǵa arnalǵan ınvestıtsııalyq baǵdarlamanyń jalpy qunyn 23 mlrd 571 mln teńge dep eseptegen. Qarajattyń basym bóligi gaz taratý jelilerin jańǵyrtýǵa, rekonstrýktsııalaýǵa jáne jańa jeliler salýǵa baǵyttalmaq.

Baǵdarlamada osy maqsattarǵa 16,97 mlrd teńge bólý kózdelgen. Budan bólek, dıspetcherlik baqylaýdyń avtomattandyrylǵan júıesin jańǵyrtýǵa 2,78 mlrd teńge, óndiristik ǵımarattar men qurylystardy jańǵyrtýǵa 1,77 mlrd teńge qarastyrylǵan.

Sondaı-aq gaz qysymyn retteıtin shkaftardy aýystyrýǵa 665 mln teńge, gaz taratý pýnktterin jańǵyrtýǵa 387 mln teńge, avtokólik pen arnaıy tehnıka satyp alýǵa 547 mln teńge bólý josparlanǵan. Jobalaý-izdestirý jumystayna 362 mln teńge, negizgi quraldardy satyp alýǵa shamamen 95 mln teńge qarastyrylyp otyr.

QazaqGaz Aimaq AQ Atyraý óndiristik fılıalynyń dırektory Qaısar Rahmetovtiń aıtýynsha, kásiporyn qala men aýdandardaǵy jalpy uzyndyǵy 6 150 shaqyrymnan asatyn gaz qubyryn kútip ustaıdy.

– Osy gaz qubyrlaryn kútip ustaý, ár úıge jylý berýdi qamtamasyz etý úshin bolat qubyrlardy polıetılen qubyrlaryna aýystyrý máselesi bar. Sonymen qatar 11 myńnan astam gaz rettegish shkafymyz bar. Olardyń 70 paıyzynyń tozyǵy jetken, 15 jyldan astam ýaqyt paıdalanylyp keledi. Olardy aýystyrý, óndiristik ǵımaratty jóndeý, qyzmetkerlerge jaǵdaı jasaý jáne qaýipsizdik sharalaryn kúsheıtý josparlanǵan, – dedi Qaısar Rahmetov.

Qaısar Rahmetovtiń aıtýynsha, qazirgi ýaqytta jergilikti bıliktiń teńgeriminde uzyndyǵy 800 shaqyrym bolatyn gaz qubyry bar. Buǵan qosa, 1200 shaqyrym qubyr ıesiz dep tanylǵan.

- Qazir sot protsesi júrip jatyr. Eger sot sheshimimen ıesiz dep tanylsa ol qubyr ákimdiktiń teńgerimine beriledi. Jergilikti bılik ıelegine alsa bizge tapsyrý jumysy júrgiziledi. Tarıftik ótinimge osy qosymsha 2 myń shaqyrym qubyrdy kútip-ustaýǵa ketetin shyǵyndy engizdik, - dep túsindirdi fılıal basshysy Qaısar Rahmetov.

Fılıal málimetinshe, 2026 jylǵy 1 qazandaǵy jaǵdaı boıynsha kásiporyn 156 236 abonentke qyzmet kórsetedi. Onyń ishinde 150 433-i – jeke turǵyn, 5 393-i – kommýnaldyq-turmystyq tutynýshy, 410-y – ónerkásiptik kásiporyn.

Investıtsııalyq baǵdarlama aıasynda Atyraý qalasyndaǵy Qazaq aýyly shaǵynaýdanynda gaz qubyryn jańǵyrtý, Maılın jáne Ýálıhanov kóshelerindegi jelilerdi rekonstrýktsııalaý, Bereke aýylyna deıingi gaz qubyryn jańartý josparlanǵan. Budan bólek, Inder kentindegi jelilerdi rekonstrýktsııalaý, Orly aýylynda gaz qubyryn salý, Kóktogaı aýylyndaǵy jelilerdi jańǵyrtý jáne Isataı aýdanyndaǵy Tuşyqudyq gaz taratý stantsııasynan Aqqystaýǵa deıingi bolat qubyrdy polıetılen qubyryna aýystyrý kózdelgen.

Fılıal avtokólik pen arnaıy tehnıkany 2028–2029 jyldary satyp alýdy josparlap otyr. Sonymen birge óndiristik bazany kúrdeli jóndeýden ótkizý jáne qyzmetkerlerdi bir ǵımaratqa ornalastyrý úshin ákimshilik ǵımarat satyp alý qajettigi kórsetilgen.

Qazir Tabıǵı monopolııalardy retteý komıtetiniń Atyraý oblysy boıynsha departamenti fılıaldyń ótinimi men tarıftik smetasyn qaraýy tıis. Nátıjesinde usynylǵan tarıftiń, ınvestıtsııalyq baǵdarlamanyń jáne gazdyń bólshek baǵasyna qatysty ózgeristerdiń qaı bóligi maquldanatyny belgili bolady. Fılıal jańa tarıf pen ınvestıtsııalyq baǵdarlamany bekitý týraly ótinimdi departamentke 2026 jylǵy 15 shildede tapsyrǵan. Zańnamaǵa sáıkes, ótinimdi qaraý merzimi – 90 jumys kúni.

Buǵan deıin Atyraýda jylý baǵasy 5 qazannan bastap jańa tarıfpen esepteletinin jazǵan edik.