Atyraýda 5 jasar balanyń júregi úsh ret toqtap qalǵan

ATYRAÝ. KAZINFORM – Atyraýda júregi úsh ret toqtap qalǵan 5 jasar bala oblystyq aýrýhananyń jansaqtaý bóliminde jatyr. 

Atyraý oblystyq densaýlyq saqtaý basqarmasy baspasóz qyzmetiniń málimetinshe, 11 maýsymda 103 pýltine saǵat 19:23te balanyń tunshyǵyp jatqany týraly shaqyrtý túsken.

«Jedel járdem brıgadasy shaqyrtýǵa 5 mınýtta jetti. Dárigerler teksergende bala es-tússiz jatqan. Onyń júrek soǵysy bolmaǵan. Ol 10 mınýt buryn túsken astyńǵy tisin jutyp, qaqalyp qalǵan. Al, ákesi jedel járdem brıgadasy kelgenshe júrek, ókpe tusyna reanımatsııa jasaǵan. Biraq, bul áreketten esh nátıje bolmaǵan. Brıgada quramyndaǵy feldsherler Meıramgúl Qurmasheva men Aıbek Jeńisov qajetti apparattardy qosyp, keń aýqymdy júrek-ókpe reanımatsııasyn júgrizdi. Osyndaı 3 tsıkl jasalǵannan keıin balada tirshilik belgileri paıda boldy», - dep habarlady basqarmanyń baspasóz qyzmeti. 

Alaıda, balada qaıtadan klınıkalyq ólim belgileri baıqalǵan. Jedel járdem kóliginde balanyń júregi 3 ret toqtaǵan. Feldsherlerdiń sátti reanımatsııasyan keıin júrek soǵysy qalpyna kelgen. Qazir 5 jasar Atyraý oblystyq balalar aýrýhanasynyń jansaqtaý bólimshesinde jatyr. 

Eske sala ketelik, buǵan deıin Atyraýda jańa týǵan sábılerge Tasqynbek pen Tasqynbı esimi qoıylǵanyn jazǵan bolatynbyz.