Atyraýda 5 jasar balany tepken tárbıeshige 314,5 myń teńge aıyppul salyndy
ATYRAÝ. KAZINFORM — Atyraýda jeke balabaqsha tárbıeshisi 5 jasar balany tepkeni úshin jumystan shyǵarylǵan edi. Endi sot úkimimen tárbıeshige 314,5 myń teńge aıyppul salyndy.
Tárbıeshiniń teris áreketine qatysty Qylmystyq kodeksiniń 140-babynyń 2-bóligimen qylmystyq is qozǵalǵan. Bul is Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynda qaraldy.
— Jeke balabaqsha tárbıeshisi sabaq kezinde 5 jasar tárbıelenýshini urǵany anyqtaldy. Sonyń nátıjesinde bala jaraqat alǵan. Sot-medıtsınalyq saraptama balanyń oń jaq sanynda kógergeni týraly qorytyndy bergen. Sottalýshy teris áreketin tolyq moıyndady. Tárbıeshiniń kinási jınaqtalǵan dáleldermen tolyq dáleldendi. Sotta dálelder zertteldi, — dep habarlady atalǵan sottan.
Prokýror sottalýshyǵa belgili bir laýazymdardy atqarý nemese belgili bir qyzmetpen aınalysý quqyǵynan 3 jyl merzimge aıyryp, 80 aılyq eseptik kórsetkish mólsherinde aıyppul salý jazasyn taǵaıyndaýdy usyndy. Al sottalýshy men onyń qorǵaýshysy qatań jaza taǵaıyndamaýdy surady. Jábirlenýshi tarap sottalýshyǵa jeńil jaza taǵaıyndaýdy qalady.
Sot úkim shyǵarmas buryn birneshe jaıtqa nazar aýdardy. Aldymen tárbıeshiniń qylmystyq teris qylyǵynyń sıpaty men qaýiptilik dárejesin saralady. Ekinshiden, tárbıeshiniń jeke basyn, otbasylyq jaǵdaıyn, turaqty tabys kózi baryn, qylmystyq teris áreketti alǵash ret jasaǵanyn eskerdi.
Tárbıeshiniń kinásin moıyndap, ókinish bildirgeni jazasy men jaýapkershiligin jeńildetetin mán-jaılarǵa jatqyzyldy. Aýyrlatatyn mán-jaılar anyqtalmady.
— Sottalýshy aıyp taǵylǵan bappen kináli dep tanyldy. Tárbıeshi pedagogıkalyq laýazymdardy jáne kámeletke tolmaǵandarmen jumys isteýmen baılanysty laýazymdardy atqarý quqyǵynan 1 jyl merzimge aıyryldy. Oǵan 80 aılyq eseptik kórsetkish mólsherinde — 314 myń 560 teńge aıyppul jazasy taǵaıyndaldy, — dep málim etti sottan.
Sot úkimi zańdy kúshine engen joq.
Eske sala keteıik, buǵan deıin Atyraýda balany tepken tárbıeshige qatysty sotqa deıingi tergeý bastalǵanyn jazǵan edik.
Keıin Atyraýdaǵy jeke balabaqshada balany tepken tárbıeshi jumystan shyǵaryldy.