Atyraýda 5 jaǵajaıdyń 3-eýi 10 jylǵa senimgerlik basqarýǵa berilgen

ATYRAÝ. KAZINFORM – Atyraý qalasynda Jaıyq ózeniniń jaǵalaýynda 5 jaǵajaı bar. Onyń 3-eýi 10 jylǵa deıin senimgerlik basqarýǵa berilgen.

Atyraý qalalyq ákimdiginiń baspasóz qyzmetiniń málimetine súıensek, byltyr 2 jaǵajaı kommýnaldyq menshikke qaıtarlyǵan.

– Qazir Atyraý qalasynyń kommýnaldyq menshiginde 5 jaǵajaı bar. Onyń 3-eýi senimgerlik basqarýǵa berildi. Máselen, 2020 jylǵy shildede «Turǵyndar qalashyǵy» shaǵyn aýdanyndaǵy jaǵajaıdy «LUCH», al I.Mechnıkov kóshesindegi jaǵajaıdy «Atyraý Saıabaq» jeke kásipkerligi senimgerlik basqarýǵa aldy. Olarmen 2030 jylǵa deıin kelisimshart jasaldy, -dep aqparat usyndy ákimdiktiń baspasóz qyzmeti.

Al 2022 jyly taǵy bir jaǵajaıdy senimgerlik basqarýǵa berý týraly uıǵarym jasalǵan. «Bııan» jeke kásipkerligi ákimdikpen jasalǵan kelisimshartqa sáıkes Q.Mámekov kóshesindegi jaǵajaıdy senimgerlik basqarýǵa alǵan. Bul kelisimsharttyń merzimi 2032 jyly aıaqtalady.

– Ótken jyly «Turǵyndar qalashyǵy» shaǵyn aýdanynda ornalasqan «Alladın» meıramhanasy tusyndaǵy jáne dene shynyqtyrý-saýyqtyrý kesheni mańyndaǵy jaǵajaılar kommýnaldyq menshikke keri qaıtaryldy. Qazir bul jaǵajaılardy senimgerlik basqarýǵa qaıta berý úshin qaýly jobasy ázirlenip jatyr. Aldaǵy ýaqytta jaǵajaılarǵa qoıylatyn talaptardy aıqyndaıtyn komıssııa jıyny ótkiziledi, -dep málim etti baspasóz qyzmeti.

Eske sala ketelik, budan buryn Atyraý oblysynyń sý aıdyndarynda 46 orynda shomylýǵa ruqsat beriletinin jazǵan bolatynbyz.