Atyraýda 5 mlrd teńgelik zaýyt jobasyna kedergi bolǵan jer daýy sheshildi
ASTANA. KAZINFORM — Atyraýda 5 mlrd teńgelik kirpish zaýytynyń qurylysyna kedergi bolǵan jer daýy sheshildi. Jobany iske asyrý jumystary jalǵasyp, zaýyt qurylysy 2027 jyly bastalady. Bul týraly óńirdegi prokýratýra málim etti.
Atyraý qalasynyń prokýratýrasy Investorlardyń quqyqtaryn qorǵaý komıtetiniń úılestirýimen quny shamamen 5 mlrd teńge bolatyn zamanaýı kirpish zaýytyn salatyn «Sapa Stone» JShS-nyń ınvestıtsııalyq jobasyn iske asyrýǵa kedergi bolǵan jer máselesin sheshti. Joba aıasynda 65 jumys ornyn qurý josparlanǵan.
— Prokýrorlyq qadaǵalaý barysynda jobany iske asyrýǵa aýdany 40 gektar jer ýchaskesine qatysty daý kedergi keltirgeni anyqtaldy. Sot talqylaýy jyl basynan beri jalǵasqan. Prokýrorlyq den qoıý sharalarynyń nátıjesinde anyqtalǵan zań buzýshylyqtar joıylyp, qabyldanǵan túpkilikti sot sheshimi ınvestorǵa jobany iske asyrý jumystaryn jalǵastyrýǵa múmkindik berdi, — delingen habarlamada.
Qazirgi ýaqytta «Sapa Stone» JShS jobalyq-smetalyq qujattamany ázirleýge kiristi. Zaýyt qurylysyn 2027 jyly bastaý josparlanǵan. Jańa óndiris óńirdegi qurylys materıaldaryn óndirý kólemin arttyrýǵa, 65 jumys ornyn ashýǵa jáne Atyraýdyń ónerkásiptik áleýetin nyǵaıtýǵa múmkindik beredi. Osylaısha, prokýrorlardyń aralasýy ınvestıtsııalyq jobanyń kelesi kezeńge ótýine múmkindik berdi.
Prokýratýra ınvestıtsııalyq jobalardy iske asyrýǵa kedergi keltiretin ákimshilik jáne ózge de tosqaýyldardy anyqtaý jáne joıý, sondaı-aq ınvestorlardyń zańdy quqyǵyn qorǵaý boıynsha jumysty jalǵastyrady.
Aıta keteıik, buǵan deıin Aqmola oblysynda quny 385 mlrd teńge bolatyn ınvestıtsııalyq jobany júzege asyryp jatqan qytaılyq kompanııa bas dırektory ınvestorlyq vızany eki ret ala almaǵanyn jazdyq. Bul másele Prokýratýra aralasqannan keıin sheshilgen bolatyn.
