Atyraýda 49 mln teńgeni jymqyrǵan mektep-ınternattyń bas esepshisi 5 jylǵa sottaldy

ATYRAÝ. KAZINFORM – Atyraý soty bıýdjettiń 49 mln teńgesin jymqyrǵan bas esepshini 5 jylǵa bas bostandyǵynan aıyrdy. Alaıda, sottalýshynyń jazasyn óteý merzimi 5 jylǵa keıin shegerildi. 

Bas esepshiniń qylmystyq isi Atyraý qalasyndaǵy № 2 sotta qaraldy. Kúdiktige Qylmystyq kodeksiniń 190-babynyń 4-bóliginiń 2-tarmaǵymen «Aldaý jáne senimdi teris paıdalaný jolymen bótenniń múlkin asa iri mólsherde jymqyryp, ıemdený) aıyp taǵylǵan.

— Sottalýshy 2023 jyldyń maýsym aıynan bastap kommýnaldyq memlekettik mekeme — mamandandyrylǵan mektep-lıtseı-ınternatynda esepshi, qyrkúıek aıynan bas esepshi bolyp qyzmet atqarǵan. 2023 jylǵy maýsym-2024 jylǵy qazan aılary aralyǵynda atalǵan mekeme dırektorynyń senimine kirip, onyń elektrondyq qoltańbasyn, «1S» jáne «Parýs» júıelerin zańsyz paıdalanǵan. Osy júıelerdiń kómegimen ol óziniń jáne senimdi adamdarynyń esepshottaryna negizsiz aqsha aýdarǵan. Ol alaıaqtyq áreketiniń saldarynan 49 mln teńgeden astam memleket qarjysyn jymqyrǵan, — dep habarlady sottan.

Sottalýshy óz kinásin tolyq moıyndaǵan. Onyń kinási jábirlenýshi ókiliniń, kýálardyń aıǵaqtarymen, tergeý áreketteriniń hattamalarymen, maman, aýdıtorlyq esep qorytyndylarymen, zattaı dáleldemelermen dáleldengen.

Sot sottalýshynyń jas balalarynyń baryn, zańsyz áreketi úshin ókingenin kinásin jeńildetetin mán-jaılar retinde tanydy. Jazany aýyrlatatyn mán-jaılar anyqtalmaǵan.

— Sot úkimimen sottalýshy kináli dep tanylyp, oǵan materıaldyq jaýapkershilikpen baılanysty laýazymdardy atqarý quqyǵynan 5 jylǵa, bas bostandyǵyn 5 jyl merzimge aıyrý jazasy taǵaıyndaldy. Qylmystyq kodeksiniń 74-babynyń 1-bóligi qoldanylyp, taǵaıyndalǵan jazany óteý 5 jyl merzimge keıinge qaldyryldy, - dep málim etti sottan.

Sot úkimi zańdy kúshine engen joq.

Eske sala ketelik, buǵan deıin Atyraýda alaıaqtyq jasaǵan bloger men onyń dosy bas bostandyǵynan aıyrylǵanyn habarlaǵan bolatynbyz.