Atyraýda 450 gektarlyq jańa arnaıy ekonomıkalyq aımaq quryldy

ASTANA. KAZINFORM –Úkimet bıyl 1 jeltoqsanda «Atyraý» arnaıy ekonomıkalyq aımaǵyn (AEA) qurý týraly qaýly qabyldady.

Qujatqa sáıkes, jańa AEA 2036 jyldyń 31 jeltoqsanyna deıin jumys isteıtin bolady. Arnaıy ekonomıkalyq aımaq Atyraý oblysy Atyraý — Dossor tas joly boıyndaǵy Atyraý qalasynyń jáne Jylyoı aýdanynyń ákimshilik-aýmaqtyq shekaralary sheginde ornalasqan. Ekonomıkalyq aımaqtyń jalpy aýmaǵy 450 gektardy quraıdy, onyń qurylymynda Atyraý-Dossor trassasy boıyndaǵy 400 gektarlyq ónerkásiptik aımaq jáne Jylyoı aýdanyndaǵy 50 gektarlyq sýbaımaq kiredi.

AEA qurýdyń negizgi maqsattary joǵary tehnologııalyq, básekege qabiletti óndiristerdiń jedel damýyna jaǵdaı jasaý, jańa ınvestıtsııalardy tartý, zamanaýı tehnologııalardy engizý, qyzmet kórsetý sapasyn arttyrý, sondaı-aq halyqtyń jumyspen qamtylýyn ósirý. Sonymen qatar óńdeýshi ónerkásiptiń hımııa, munaı-hımııa, metallýrgııa, beımetall mıneraldyq ónimder, metall óńdeý, rezeńke jáne plastmassa buıymdary sııaqty baǵyttary damytylady.

Oǵan qosa, AEA aýmaǵynda arnaıy quqyqtyq rejım engiziledi jáne erkin keden aımaǵynyń kedendik rásimi qoldanylady. Qujatqa sáıkes, erkin keden aımaǵy áreket etetin ýchaske kedendik baqylaý aımaǵy bolyp tabylady. Ol kedendik baqylaýdy qamtamasyz etý úshin qajetti jabdyqtarmen qamtylýy tıis. Investıtsııalyq óńirdiń perımetrin qorshaý, beınebaqylaý júıesimen jabdyqtaý jáne ózge de talaptardy keden salasyndaǵy ýákiletti organ belgileıdi.

AEA aýmaǵynda shetel azamattarynyń, azamattyǵy joq adamdardyń jáne olardyń kólik quraldarynyń kirý, shyǵý, tranzıt jáne bolý tártibi Qazaqstan Respýblıkasynyń zańnamasyna jáne halyqaralyq kelisimderge saı júzege asyrylady.

AEA qurý merzimi aıaqtalyp, aımaq taratylǵan jaǵdaıda, Atyraý oblysynyń ákimdigi:

— Ekonomıkalyq aımaqtyń taratylýy týraly habarlandyrýdy merziminen keminde úsh aı buryn BAQ-ta jarııalaıdy;

— ónerkásiptik-ınvestıtsııalyq óńir aýmaǵynda jumys isteıtin tulǵalarǵa taýarlardy basqa kedendik rásimge qaıta resimdeý tártibin túsindiredi;

— AEA taratylǵannan keıin bir aı ishinde Prezıdent pen QR Úkimetine aımaq jumysynyń qorytyndy esebin usynady.
«Atyraý» AEA-nyń 2036 jylǵa deıingi nysanaly ındıkatorlary:

— jalpy ınvestıtsııa kólemi — 320 mlrd teńge;

— sheteldik ınvestıtsııalar — 120 mlrd teńge;

— otandyq ınvestıtsııalar — 200 mlrd teńge;

— óndirilgen taýarlar men kórsetilgen qyzmetterdiń jalpy kólemi — 410 mlrd teńge;

— qatysýshy kompanııalar sany — 70;

— qurylatyn jumys oryndary — 2500;

— óndiristegi qazaqstandyq úles — 85%.

Qaýly 2025 jylǵy 1 jeltoqsannan bastap kúshine endi.

Buǵan deıin Úkimet TURAN arnaıy ekonomıkalyq aımaq terrıtorııasyn keńeıtken.