Atyraýda 41 tarıhı eskertkishtiń qorǵaý aımaǵy belgilendi
ATYRAÝ. KAZINFORM — Atyraý oblysynda bıyl 41 tarıhı eskertkishtiń qorǵaý aımaǵy belgilendi. Sonymen qatar 171 tarıhı-mádenı mura nysanyna monıtorıng júrgizilip, 100 nysanǵa saraptama jasaldy.
Atyraý oblystyq tarıhı-mádenı murany zertteý ortalyǵynyń málimetinshe, monıtorıng jumysy Qyzylqoǵa, Qurmanǵazy, Inder jáne Isataı aýdandarynda júrgizilgen. Ekspedıtsııalyq top atalǵan aýdandardy 20 kún boıy aralap, tarıhı-mádenı nysandardyń jaı-kúıin zerdelegen.
Zertteý barysynda Qyzylqoǵa aýdanynda 90, Qurmanǵazyda 40, Inderde 34 jáne Isataıda 7 nysan tekserildi. Sonymen birge 100 nysanǵa saraptama júrgizilip, onyń 80-ine eskertkish mártebesin berý týraly sheshim qabyldandy.
Bıyl 41 eskertkishtiń aýmaǵy belgilendi. Buǵan deıin oblystaǵy 180 eskertkishtiń qorǵaý aımaǵy bekitilgen edi.
Mamandardyń aıtýynsha, endigi mindet — qorǵaý aımaqtary belgilengen nysandardyń kadastrlyq jáne josparlaý qujattaryn rásimdep, olardy tarıhı-sáýlet tirek josparlary men karta-shemalaryna engizý.
Eske salaıyq, buǵan deıin Reseıdiń Tyva Respýblıkasyndaǵy «Patshalar ańǵarynda» erte saq dáýirine jatatyn Týnnýg qorǵanyn qazý kezinde buryn-sońdy teńdesi tabylmaǵan eki tas eskertkish anyqtalǵanyn jazǵan edik. Arheologterdiń aıtýynsha, bul oljalar saq mádenıetiniń qalyptasý kezeńin tereńirek zertteýge jol ashady.
