Atyraýda 40 jastan asqandar alaıaqtyń arbaýyna jıi túsken
ATYRAÝ. KAZINFORM – Ótken jyly Atyraý oblysynda ınternet-alaıaqtyq boıynsha 1 200-ge jýyq qylmys tirkelgen. 11 aıdyń nátıjesi boıynsha 551 is sotqa joldanǵan. Jalpy jábirlenýshi sany 2 200-ge jýyqtaıdy. Bul týraly Atyraý oblystyq prokýratýrasy málimdedi.
Quzyrly organnyń málimetine súıensek, alaıaqtar elektrondyq pochta men saıttardy qoldaný, jalǵan onlaın qyzmetter kórsetý, ınternet arqyly satý, onlaın qaryz berý jáne bankterdiń atyn qoldanyp, jalǵan aqparat berý ádisin jıi paıdalanyp, azamattardy san soqtyrǵan.
– 2025 jyldyń 11 aıynda óńir turǵyndaryna keltirilgen materıaldyq zalal 2 mlrd 570 mln teńgeden asty. Onyń 1 mlrd 597 mln teńgesi óndirilip, zalaldy óteý deńgeıi 62,1 paıyzdy qurady. Prokýratýra tarapynan bankter jáne mıkroqarjy uıymdaryna qatysty tekserý júrgizgen joq. Jalpy qylmystarǵa taldaý júrgizip otyr, - dedi oblystyq prokýratýranyń baspasóz qyzmeti.
Óńirde jasy ulǵaıǵan azamattar ǵana emes, jastar da alaıaqtarǵa aldanyp jatyr. Mysaly, byltyr 18-20 jas aralyǵyndaǵy 60-tan asa azamat, 21-29 jas aralyǵyndaǵy 450-ge jýyq atyraýlyq paıdakúnemderge tap bolǵan. 30-39 jas aralyǵyndaǵy jábirlenýshilerdiń sany 700-ge jýyqtasa, 40 jastan joǵarylar 940-tan asady.
Polıtseılerdiń sózinshe, ınternet alaıaqtar jalǵan ınvestıtsııalyq platformalar arqyly turǵyndardy aldap-arbaýǵa kóshken. Olar aılasyn asyrý úshin halyqty óz bank kartalaryn toltyrýǵa kóndirip, aldyn ala qoldaryna túsken karta derekterin paıdalanady. Sóıtip, qarajatty túgel sheship alady. Sondyqtan polıtseıler bilim berý uıymdary men joǵary oqý oryndarynda jastarǵa arnalǵan túsindirý jumystaryn kúsheıtip jatyr.
Buǵan deıin SQO-da bıyl 600-ge jýyq ınternet-alaıaqtyq deregi tirkelgeni týraly jazdyq.
