Atyraýda 4 jasar bala 10-qabattan qulap, mert boldy

ATYRAÝ. KAZINFORM – Atyraý qalasynda 4 jasar bala turǵyn úıdiń 10-qabatynan qulap, mert boldy.

Atyraý qalalyq polıtsııa basqarmasynyń málimetinshe, oqıǵa búgin, 14 maýsymda bolǵan.

«Búgin saǵat 9:00 shamasynda Atyraý qalasyndaǵy kópqabatty úılerdiń biriniń 10-qabatynan 4 jastaǵy ul qulap ketti. Balaqaı oqıǵa ornynda qaıtys boldy», -dep habarlady qalalyq polıtsııa basqarmasynan.

Qazir atalǵan derekke qatysty QR Qylmystyq kodekstiń 141-babynyń 2-bóligimen tergeý amaldaryn júrgizý jumystary bastaldy. Ózge aqparat tergeý múddesine saı jarııalaýǵa jatpaıdy.

Eske sala ketelik, buǵan deıin Atyraý oblysynda qańtardan beri órttiń saldarynan 11 adam qaza tapqanyn jazǵan bolatynbyz.

Atyraý oblystyq tótenshe jaǵdaılar departamenti memlekettik órt baqylaý basqarmasynyń bastyǵy, azamattyq qorǵaý podpolkovnıgi Narıman Óteshovtiń málimetine súıensek, jyl basynan beri 121 órt oqıǵasy tirkelgen.

Bul kórsetkish ótken jylmen salystyrǵanda 3 paıyzǵa ósip otyr. Jyl basynan beri órttiń basym bóligi – 56 derek turǵyn úı sektorynda tirkeldi. Sonymen birge, 40 kólik órtendi. Jalynnyń saldarynan 11 adam ajal qushty. Al, 6 adam kúıik alyp, zardap shekti.

Sondaı-aq, Atyraý oblysynda jyl basynan beri jol apatynan 56 adam mert bolǵanyn habarlaǵan edik.