Atyraýda 4 mlrd teńgege salynǵan, áli ashylmaǵan mekteptiń sylaǵy túsip jatyr
ATYRAÝ. KAZINFORM – Atyraý qalasyna qarasty Erkinqala-2 yqshamaýdanynyń turǵyndary birneshe jyldan beri salynyp jatqan mektepti tezirek paıdalanýǵa berýdi talap etip otyr. Ata-analardyń aıtýynsha, jańa bilim ordasynyń ashylýy sozylyp ketkendikten balalar úsh aýysymda oqýǵa májbúr. Al áli paıdalanýǵa berilmegen jańa ǵımarattyń qabyrǵalaryndaǵy sylaqtar túsip jatyr.
Turǵyndardyń sózinshe, mektep qurylysy 6 jyl buryn bastalǵan. Qazir Erkinqala aýylyndaǵy 680 oryndyq jalǵyz mektepte 2 myńnan astam bala bilim alyp júr. Sonyń saldarynan oqýshylar úsh aýysymda oqıdy. Sondyqtan keı ata-analar balalaryn qaladaǵy mektepterge aparady.
– Úsh jyldan beri mekteptiń daýy bitpeı tur. Erkinqalada bir ǵana mektep bar. Biraq balalar sany jyl saıyn kóbeıip keledi. Ótken jyly «bıyl tapsyramyz» degen edi, alaıda bilim ordasy ashylmady,– dedi turǵyn Gúlbaram Kálenova.
Taǵy bir turǵyn Gúljara Semǵalıevanyń aıtýynsha, ata-analardan jyl saıyn bolashaq oqýshylardyń tizimi suralady. Alaıda naqty nátıje bolmaǵandyqtan halyqtyń senimi azaıǵan.
– Bul mektep 2020 jyldan bastap salyna bastady. Eki jyl boıy qańqasy ǵana turdy. Jyl saıyn balalardyń tizimin suraıdy. Biraq odan esh nátıje joq, – dedi aýyl turǵyny.
Turǵyndardyń sózinshe, jańa mektep byltyr qyrkúıek aıynda paıdalanýǵa berilýi tıis bolǵan. Alaıda qurylys jumystary taǵy da sozylyp ketken.
Qurylys basqarmasy ókilderiniń málimetinshe, 600 oryndyq jańa mektep qurylysyna bıýdjetten 4 mlrd teńge bólingen. Sheneýnikter turǵyndardyń mektep qurylysy 6 jyl buryn bastaldy degen pikirimen kelispeıdi. Basqarma ókiliniń aıtýynsha, joba 2023 jyly bastalǵan. Keıin jobaǵa túzetýler engizilgen.
– Іshindegi jabdyqtary túgel ornatylǵan. Qyrkúıekke deıin bala qabyldaýdy bastaımyz. Nysan oblystyq bilim berý basqarmasyna tapsyrylady, – dedi Atyraý oblystyq qurylys, sáýlet jáne qala qurylysy basqarmasynyń bas mamany Raıymbek Hamzaev.
Al merdiger mekemeniń ókili Aıan Isataıuly qurylys jumystary jospar boıynsha bıylǵy 30 naýryzda aıaqtalǵanyn jetkizdi.
– Biz bul mektepke 5 jyl kepildik beremiz. Maýsym aıynda tapsyrys berýshi tarapynan aıtylǵan eskertýlerdi túzetip, nysandy tolyq tapsyramyz, – dedi merdiger ókili.
Jaýaptylar daıyn dep ataǵan mektepke kirý kezinde qabyrǵalardyń sylaqtary túsip jatqany belgili boldy. Mamandar muny qalypty qubylys, barlyǵy qalypqa keltiriletinin málimdedi.
Buǵan deıin Atyraýdaǵy Kóktem yqshamaýdanynyń turǵyndary 5 jyldan beri aýyz sý qysymynyń tómendigine shaǵymdanyp kele jatqanyn jazǵan edik.
