Atyraýda 4 myńnan asa adamnyń kólik salyǵy boıynsha 321 mln teńge bereshegi bar

ATYRAÝ.KAZINFORM — Baspasóz brıfınginde Atyraý oblysy boıynsha Memlekettik kirister departamentiniń ókili qazirgi ýaqytta kólik salyǵy boıynsha 4246 tulǵanyń 321 mln teńge bereshegi baryn málimdedi.

Jeke tulǵalar kólik salyǵyn jyl saıyn turǵylyqty jeri boıynsha 1 sáýirge deıin tóleýi tıis. Al múlik salyǵy 1 qazanǵa deıin tólenedi. Ótken jyl úshin eseptelgen múlik salyǵyn tóleý merzimi — 2026 jyldyń 1 qazanyna deıin.

— Salyqty ýaqytynda tóleý — ár adamnyń mindeti. Qazir kólik salyǵy boıynsha 4 246 jeke tulǵanyń 321 mln teńge bereshegi bar. Onyń 226 mln teńgesi — negizgi qaryz, 95 mln teńgesi — keshiktirgeni úshin qosylǵan aqsha. Al múlik salyǵy boıynsha 10 415 adamnyń 50 mln teńge bereshegi qalyptasyp otyr, — dedi departament ókili Bısen ıÝsýbalıev.

Onyń sózinshe, salyq ýaqytynda tólenbegen jaǵdaıda aldymen habarlama jiberiledi. Eger bereshek ótelmese, salyq buıryǵy shyǵarylyp, is jeke sot oryndaýshylaryna joldanady.\

Keıin májbúrli túrde óndirip alý sharalary qoldanylady.

Sondaı-aq Bısen ıÝsýbalıev bıyldan bastap kúshine enetin ózgeristerge de toqtaldy.

— Endi kólik eski bolǵan saıyn salyq azaıady. Eger jeńil kólik 10 jyldan asqan bolsa, salyq 30 paıyzǵa tómendetilip esepteledi. Al 20 jyldan asqan kólikter úshin salyq eki ese azaıady. Sonymen qatar sharýa qojalyqtary bir pıkap kóligi úshin endi salyq tólemeıdi, — dedi ol.

Budan bólek, qymbat múlki bar azamattarǵa qatysty jańa tártip engizildi. Eger bir adamnyń barlyq úıi, ǵımaraty jáne basqa da múlkiniń jalpy quny 450 mln teńgeden assa, osy somadan asqan bóligine 2 paıyz qosymsha salyq salynady. Múlik neǵurlym qymbat bolsa, tólenetin salyq ta soǵurlym joǵary bolady.

Buǵan deıin Jambyl oblysynda salyqtan jaltarǵan kompanııadan 1,1 mlrd teńge óndirilgenin jazǵan edik.