Atyraýda 4 aıda 7 kásiporynǵa 13,7 mlrd teńge aıyppul salyndy

ATYRAÝ. KAZINFORM – Atyraý oblysynyń ekolog mamandary 4 aıda 7 kásiporynǵa 13,7 mlrd teńgeniń aıyppulyn salǵan. Óıtkeni óńirdegi kásiporyndar ekologııalyq talapty saqtamaǵan. 

Atyraý oblysy boıynsha ekologııa departamentiniń basshysy Álibek Bekmuhametovtiń málimetine súıensek, jospardan tys júrgizilgen 7 tekserý kezinde 7 buzýshylyq anyqtalǵan. Al, ruqsat berý talaby 3 ret buzylǵan. 

«Departament mamandarynyń tekserýiniń qorytyndysymen birneshe quqyqbuzýshylyq deregi tirkeldi. Onyń ishinde qaýipti qaldyqtardy ruqsatsyz jınaý, memlekettik ekologııalyq saraptama qorytyndysyn oryndamaý, ruqsat etilmegen shyǵyndylar shyǵarý, mindetti málimetterdi usynbaý, jer búldirý jáne ekologııalyq talaptardy buzýǵa baılanysty derekter bar. Baqylaý júrgizý nátıjesimen 13 mlrd 704 mln 771 myń teńgeniń 45 ákimshilik aıyppuly salyndy», - dep habarlady Álibek Bekmuhametov. 

Onyń aıtýynsha, kásiporyndarǵa salynǵan aıyppuldyń 18 mln 555 myń teńgesi óndirilip otyr. Bul aıyppuldy kásiporyndar óz erkimen tóleýge yqylas tanytqan. 

«Qazir sotta úsh ákimshilik is qaralyp jatyr. Bul ister boıynsha salynǵan aıyppuldyń kólemi 13 mlrd 686 mln teńgeni quraıdy», - dep málim etti Álibek Bekmuhametov. 

Sondaı-aq ótken jyly salynǵan 1 mln 311 myń teńgeniń tórt aıyppuly tolyq óndirilgen.

Eske sala ketelik, buǵan deıin «Qashaǵanda» munaı tógilgeni rastalsa, jospardan tys tekserý júrgiziletinin habarlaǵan edik.