Atyraýda 37 jastaǵy turǵyn 1 keliden astam sıntetıkalyq esirtkimen ustaldy

ATYRAÝ. KAZINFORM – Atyraý oblysynyń turǵynynan 1 keliden asatyn sıntetıkalyq esirtki tárkilendi. Kúdikti qamaýǵa alyndy. 

Atyraý oblystyq polıtsııa departamentiniń baspasóz qyzmetinen málim etkendeı, Inder aýdanynda turatyn er adam sıntetıkalyq esirtkini taratýmen aınalysqan.

— Esirtki qylmysyna qarsy is-qımyl basqarmasynyń qyzmetkerleri jedel izdestirý is-sharasyn júrgizip, Atyraý qalasynyń aýmaǵynda esirtki zattaryn taratýmen aınalysqan 37 jastaǵy turǵyndy ustady. Kúdiktiniń jeke basyn tintý kezinde, keıin onyń kórsetýimen 100 dana oralǵan aq tústi untaq tárizdes zattar tárkilendi. Tárkilengen zattardyń salmaǵy 1 keliden asatyn sıntetıkalyq esirtki ekeni anyqtaldy, — dep habarlady departamenttiń baspasóz qyzmeti.

Qazir ustalǵan kúdiktige qatysty qylmystyq is qozǵaldy. Kúdikti qamaýǵa alyndy.

— Polıtsııa qyzmetkerleri keshendi tergeý amaldary júrgizýdi bastady. Ózge aqparat tergeý múddesine sáıkes jarııalaýǵa jatpaıdy, — dep málim etti departamenttiń baspasóz qyzmetinen.

Eske sala ketelik, budan buryn Atyraýda esirtki jasyryp júrgen 17 jasar qyzylordalyq ustalǵanyn jazǵan edik.