Atyraýda 350 adam qoǵamdyq jumysqa tartyldy
ATYRAÝ. KAZINFORM — Atyraý oblysynda jyl basynan beri 350 adam sot sheshimine sáıkes qoǵamdyq jumysqa tartyldy. Olar turǵylyqty jeri boıynsha 10-nan 100 saǵatqa deıin aqysyz eńbek etýge mindettelgen.
Byltyr 1 qyrkúıekten bastap Qazaqstanda ákimshilik jaza túri retinde qoǵamdyq jumys engizildi. Bul jaza sot sheshimimen usaq buzaqylyq, otbasylyq-turmystyq quqyq buzýshylyqtar, qoǵamdyq oryndardy lastaý, alkogoldik ishimdikter ishý nemese mas kúıde júrý jáne ózge de quqyq buzýshylyqtar úshin qoldanylady.
Oblystyq polıtsııa departamenti profılaktıkalyq jumysty úılestirý basqarmasy bastyǵynyń orynbasary Bolat Ahmetovtiń aıtýynsha, qoǵamdyq jumys azamattardyń turǵylyqty jeri boıynsha, qoǵamǵa paıdaly ári aqysyz eńbek túrinde isteledi.
— Qoǵamdyq jumysty uıymdastyrý jáne oryndalýyn baqylaý jergilikti atqarýshy organdarǵa júktelgen. Al ishki ister organdary mundaı jazadan jaltarý faktileri týraly habarlama túsken jaǵdaıda zańda belgilengen sharalardy qabyldaıdy. Belgilengen ýaqytta dáleldi sebepsiz kelmeý, jumysty oryndaýdan bas tartý nemese jaltarý zańnamaǵa sáıkes jaýapkershilikke ákep soǵady, — dedi basqarma bastyǵynyń orynbasary Bolat Ahmetov.
Polıtsııa málimetinshe, bul shara azamattardyń quqyqtyq jaýapkershiligin arttyryp, qoǵamdyq tártipti nyǵaıtýǵa jáne quqyq buzýshylyqtardyń qaıtalanýyna jol bermeýge baǵyttalǵan.
Buǵan deıin Qyzylordada jynystyq zorlyq-zombylyqtyń aldyn alý júıesi iske qosylǵanyn habarlaǵan edik.
