Atyraýda 331 qylmysty ashýǵa kóshe kamerasynyń kómegi tıgen

ATYRAÝ. KAZINFORM – Byltyr Atyraý qalasyndaǵy jedel basqarý ortalyǵy arqyly 25,5 myń quqyq buzýshylyq anyqtaldy. Atalǵan ortalyqqa ár túrli sıpattaǵy 70 myńnan astam habar berilgen. 

Atyraý qalalyq polıtsııa basqarmasyna qarasty jedel basqarý ortalyǵynyń aǵa ınspektory Saıra Baımuhambettiń málimetinshe, munaıly shahar kóshelerinde 3 myń 773 kamera ornatylǵan.

– Ótken jyly kóshedegi beınebaqylaý kameralary arqyly 25 myń 558 ákimshilik quqyq buzýshylyq anyqtaldy. Kameralardyń kómegimen 331 qylmys ashyldy. Kóshelerdegi kameralarǵa túsken qylmystyq jáne ózgede quqyq buzýshylyqtardyń arasynda urlyq, usaq urlyq men buzaqylyq derekteri bar. Kameralar arqyly alkogoldik ishimdik iship, kólik júrgizgenderdi, kóshede, ne qoǵamdyq oryndarda mas kúıde júrgenderdi anyqtaýǵa jol ashyldy, - deıdi Saıra Baımuhambet. 

Onyń aıtýynsha, qala aýmaǵyndaǵy adamdar jıi jınalatyn 16 oryda polıtsııany jedel shaqyrýǵa arnalǵan «SOS» dabyl batyrmasy ornatylǵan. 

– «SOS» batyrmasyn basý arqyly jedel basqarý ortalyǵynyń ınspektorlarymen aýdıo jáne beınejazba nusqada baılanysýǵa bolady. Al «Interceptor» júıesimen ákimshilik aıyppuldardy ótelmegen 4 myń 19 boryshker tirkeldi. Boryshkerlerdiń 1 myń 451 kóligi arnaıy turaqqa qoıyldy. Osyndaı sharadan soń 2 myń 568 boryshker aıyppulyn tóledi, - dep málim etti Saıra Baımuhambet. 

Sondaı-aq «Sergek-Qorǵaý» júıesimen 31 myń 359 derek anyqtalǵan. Onyń ishinde 19 myń 813 adamǵa aıyppulǵa qatysty nusqama berilgen. Al aıyp turaǵyna 476 kólik qoıylǵan. 

Eske sala ketelik, buǵan deıin Atyraý oblysynyń jasóspirimderi 1 jylda 67 qylmys jasaǵanyn jazǵan bolatynbyz.