Atyraýda 3 myńnan astam sheteldik nómir taqqan avtokólik aıyp turaǵyna qoıylǵan
ATYRAÝ. KAZINFORM – Jyl basynan beri Atyraý oblysynda aıyppul bereshegi bar 3 138 sheteldik nómirli avtokólik aıyp turaǵyna qoıyldy. Bul týraly Atyraý oblysy polıtsııa departamentiniń protsessıng ortalyǵynyń bastyǵy Jeńis Dáýletov málimdedi.
Bıylǵy 11 aıdyń qorytyndysy boıynsha elde tirkelmegen sheteldik nómirli avtokólikterge qatysty 161 quqyqbuzýshylyq anyqtalyp, 4,6 mıllıon teńgeden astam aıyppul óndirilgen. Al tirkelmegen kólik quralyn basqarý deregi boıynsha 559 quqyqbuzýshylyq belgili boldy. Óndirilgen aıyppul kólemi 24 mıllıonǵa jýyqtaıdy.
Spıkerdiń aıtýynsha, sheteldik avtokólikterdi zańdastyrýǵa 2023 jylǵy 17 shildede ruqsat berilgen. Osy kezeńde 2022 jylǵy 1 qyrkúıekke deıin Eýrazııalyq ekonomıkalyq odaq elderinen ákelingen 3 911 avtokólik 5 jyl merzimge ýaqytsha esepke alynǵan.
– «Jol júrisi týraly» zań talaptaryna sáıkes, qazirgi ýaqytta el aýmaǵyna ákelinetin kólik quraldary 10 jumys kúni ishinde mindetti túrde tirkelýi tıis. Al kólik quralynyń zańdy qujattary bolmaǵan jaǵdaıda Ákimshilik quqyqbuzýshylyq týraly kodekstiń 590-babynyń 2-bóligine sáıkes jaýapkershilik kózdelgen, - dedi J. Dáýletov.
Sonymen qatar qoldanystaǵy zańnamaǵa sáıkes el aýmaǵynda róli oń jaqta ornalasqan avtokólikterdi bastapqy tirkeýge qoıýǵa, sondaı-aq olardy jolaýshylar men júk tasymaldaý jáne taksı qyzmetinde paıdalanýǵa tyıym salynǵan.
Eske salaıyq, osyǵan deıin 66 ret jol erejesin buzǵan qyzylordalyqqa 2 mln teńgeden astam aıyppul salynǵanyn habarlaǵan edik.