Atyraýda 3 kún buryn Jaıyqqa batyp ketken bozbala tabylmaı jatyr

ATYRAÝ. KAZINFORM — Atyraýda 18 jasar bozbala motorly qaıyqtan qulap, Jaıyq ózenine batyp ketti. Qutqarýshylar ony 3 kúnnen beri izdep jatyr.

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, oqıǵa 3 mamyrda bolǵan. 

— Saǵat 17:25–te tótenshe jaǵdaılar departamentine Jaıyq ózenine er adamnyń sýǵa batyp ketkeni týraly qońyraý tústi. Departament qutqarýshylary oqıǵa ornyna jedel jetip, 2007 jylǵy azamat K.A.-nyń ózenniń arǵy betine ótip bara jatqan motorly qaıyqtan qulap ketkenin anyqtady. Іzdeý jumysyna kún saıyn 12 qutqarýshy, 4 júzý quraly, 3 tehnıka, ushqyshsyz ushý apparaty tartyldy, — dep habarlady departamenttiń ımıdjdik jumys jáne syrtqy kommýnıkatsııalar toby.

Sondaı-aq, oblystyq polıtsııa departamentiniń qyzmetkerleri men kemesi jumyldyryldy. 

— Іzdestirý jumystary sý astyna súńgý, akvatorııany sholý, ózen túbin traldaý arqyly júrgizilip jatyr. Búginge deıin shamamen 2 shaqyrym aýmaq qaraldy. Alaıda, ózende aǵys qatty, bul sý astynda kórý deńgeıin tómendetti. Sý astyndaǵy bógde zattar izdestirý jumystaryna qıyndyq keltirip otyr, — dep málim etti departamenttiń ımıdjdik jumys jáne syrtqy kommýnıkatsııalar tobynan.

Jaıyq ózenine batqan bozbalany izdestirý jumysy jalǵasyp jatyr. 

Eske sala keteıik, budan buryn Atyraý oblysynyń sý aıdyndarynda 46 orynda shomylýǵa ruqsat beriletinin jazǵan edik.