Atyraýda 3 kún boıy polıtseıler kúsheıtilgen rejımde jumys isteıdi
ATYRAÝ.KAZINFORM — Atyraý qalasyndaǵy ortalyq kópir mańyna 50-den astam kólik júrgizýshisi jınalyp, óńirge ózge aımaqtardan arnaıy kelgen tártip saqshylarynyń qandaı qyzmetpen aınalysý úshin tartylǵanyn bilmek boldy.
Júrgizýshiler Atyraýǵa arnaıy kele jatqan polıtsııa qyzmetkerleriniń ne sebepti kele jatqany jáne neni tekseretini týraly aqparat bolmaǵandyqtan jınalǵan.
Atyraý oblysy PD bastyǵynyń birinshi orynbasary, prokýrorlar bastaǵan top olarmen kezdesip, suraqtaryna jaýap berdi.
Olar jınalǵan topqa bunyń ádettegi patrýldik jumys ekenin, zań talaptaryn saqtaǵandarǵa eshqandaı shara qoldanylmaıtynyn aıtty.
PD málimetinshe, is-sharaǵa Astana qalasynan, Qaraǵandy jáne Qostanaı oblystarynan polıtsııa qyzmetkerleri tartyldy.
— 21-23 mamyr aralyǵynda óńir aýmaǵynda reıd jáne jedel-profılaktıkalyq is-sharalar ótkiziledi. Osy kezeńde polıtsııa qyzmetkerleri kúsheıtilgen rejımde qyzmet atqarady. Negizgi maqsat — qoǵamdyq tártipti qamtamasyz etý, quqyq buzýdyń aldyn alý, jol qozǵalysy qaýipsizdigin kúsheıtý jáne turǵyndardyń qaýipsizdigin saqtaý, — delingen resmı habarlamada.
Polıtsııa qyzmetkerleri qoǵamdyq oryndarda, jol boıynda jáne halyq kóp shoǵyrlanatyn aýmaqtarda baqylaýdy kúsheıtip, quqyq buzýshylyqtardyń aldyn alý baǵytynda jumystar júrgizedi.
Buǵan deıin Atyraýda mas kúıde kólik aıdaǵan mektep dırektory qyzmetinen ketkenin jazǵan edik.
