Atyraýda 3 balabaqshanyń meńgerýshisi memleketten 16,5 mln teńgeni zańsyz alǵan

ATYRAÝ. KAZINFORM – Atyraý qalasyndaǵy 3 balabaqshanyń meńgerýshisi memleketten 16,5 mln teńgeni alaıaqtyq jolmen alǵany anyqtalǵan. Qazir olarǵa qatysty sotqa deıingi tergeý júrip jatyr.

Atyraý qalalyq prokýratýrasy bilim berý jáne mektepke deıingi mekemelerdiń qyzmetine tekserý jumystaryn júrgizdi.

«Tekserý sanıtarııalyq-epıdemıologııalyq, órt, medıtsınalyq talapqa qatysty zań buzýshylyqtar anyqtaldy. Soǵan baılanysty birneshe aıyppul salý uıǵaryldy. Atap aıtqanda, sanıtarııalyq-epıdemıologııalyq baqylaý basqarmasy 14 jeke, 42 memlekettik mektep pen 30 jeke, 20 memlekettik balabaqshaǵa 63 040 900 teńge, medıtsınalyq jáne farmatsevtıkalyq baqylaý departamenti 9 jeke, 2 memlekettik mektepke, 14 jeke, 8 memlekettik balabaqshaǵa 4 287 360 teńge, tótenshe jaǵdaılar basqarmasy 3 jeke, 1 memlekettik mektepke, 20 jeke, 20 memlekettik balabaqshaǵa 1 218 360 teńge, bilim salasynda sapany qamtamsyz etý departamenti 12 jeke, 47 memlekettik mektep pen 11 jeke, 1 memlekettik balabaqsha 11 795 940 teńge, eńbek ınspektsııasy basqarmasy 2 jeke mektep pen 4 jeke balabaqshaǵa 1 772 160 teńge aıyppul saldy», -dep habarlady oblystyq prokýratýradan.

Bilim berý salasyndaǵy tekserý qorytyndysymen 260 prokýrorlyq qadaǵalaý aktisi engizilgen. Sonyń nátıjesinde 51 laýazymdy tulǵa tártiptik jaýaptylyqqa tartylǵan. Al, memleket paıdasyna 82 114 720 teńge aıyppul óndirildi.

«Memleketten alaıaqtyq jolmen zańsyz 16,5 mln teńge alǵan úsh balabaqshanyń meńgerýshisine qatysty sotqa deıingi tergep-tekserý bastaldy. Zańsyz alynǵan qarjy memleketke tolyq qaıtaryldy. Qalalyq prokýratýra balalardyń qaýipsizdigi men bıýdjet qarajatynyń maqsatty jumsalýyn basty nazarda ustaıdy», - dep málim etti oblystyq prokýratýradan.

Eske sala ketelik, budan buryn Atyraýda kompanııa dırektory 25 adamǵa jalǵan kelisimmen 313 mln teńgeniń páterlerin satqanyn jazǵan edik.