Atyraýda 28,7 myń gektar jer shegirtkege qarsy óńdeldi
ATYRAÝ. KAZINFORM — Atyraý oblysynyń Qurmanǵazy, Qyzylqoǵa, Jylyoı, Isataı jáne Inder aýdandarynda shegirtke dernásilderiniń І–ІІІ jas satylary tirkeldi. Óńirde zııankesterdiń taralýyn baqylaý jáne olarǵa qarsy hımııalyq óńdeý jumystary jalǵasyp jatyr.
Máselen, Qurmanǵazy aýdanyndaǵy keıbir eldimekenderde jáne jol boıynda shegirtkeler ádettegiden kóp baıqalǵan.
12 maýsymdaǵy jaǵdaı boıynsha oblys aýmaǵynda shegirtkelerdiń taralýyn anyqtaý maqsatynda 345,2 myń gektardan astam jer zertteldi. Monıtorıng barysynda zııankesterdiń shoǵyrlanǵan oshaqtary anyqtalyp, olarǵa qarsy jedel túrde hımııalyq óńdeý júrgizilip jatyr.
Qazirgi ýaqytta oblys boıynsha 28,7 myń gektar aýmaq óńdelgen. Shegirtke sany egistik pen jaıylymdarǵa zııan keltirý qaýpi joǵary deńgeıge jetken aýmaqtardyń 96 paıyzynda zalalsyzdandyrý jumysy júrgizildi.
Oblystyq aýyl sharýashylyǵy jáne jer qatynastary basqarmasynyń málimetinshe, óńdeý jumystaryna arnaıy jerústi tehnıkalary men asa jeńil avıatsııa quraldary tartylǵan.
— Qoldanylyp jatqan preparattar Qazaqstan Respýblıkasynda tirkelgen jáne aýyl sharýashylyǵy daqyldaryn zııankesterden qorǵaýǵa arnalǵan. Mamandar zııankesterdiń damýy men taralýyn kúndelikti baqylaýda ustap otyr. Shegirtkege qarsy kúres sharalary bekitilgen josparǵa sáıkes júrgizilýde, — dep habarlady basqarmanyń baspasóz qyzmeti.
Jalpy bıyl Atyraýda shegirtkege qarsy kúreske 250 mln teńge bólindi.
