Atyraýda 260 boryshker múlde alıment tólemegen

ATYRAÝ. KAZINFORM – Atyraý oblysynda úsh myńnan astam boryshkerdiń jalpy bereshegi 3 mlrd teńgeden asady. Bul týraly oblystyq ádilet departamenti málimdedi. 

Qazir oblysta 74 jeke sot oryndaýshy qyzmet atqarady. Olarda alıment óndirý boıynsha 10 myńnan astam atqarý qujaty bar. Sonyń ishinde 5 myń is boıynsha alıment tólemderi boryshkerlerdiń jumys ornynan turaqty túrde ustalyp otyr. Sonymen qatar 2 myńǵa jýyq azamat alımentti ishinara, erikti túrde tóleýde. Múldem tólemeıtin boryshkerlerdiń sany – 260. Oblysta alımentti turaqty tóleıtin 28 áıel bar.

– Elimizde ortasha jalaqy kólemi – 429 368 teńge. Boryshker jumyssyz qalǵan jaǵdaıda alıment ortasha jalaqy mólsherinen paıyzben eseptelip ustalady, sondyqtan bereshektiń kólemi arta beredi. Osyǵan baılanysty jumyssyz qalǵan azamattar sot oryndaýshysyn der kezinde habardar etip, jumyssyzdyq mártebesin rásimdep, tıisti anyqtamasyn usynýy qajet, - dedi oblystyq Ádilet departamentiniń bólim basshysy Aqbóbek Dúsipqalıeva.

Qoldanystaǵy zańnama boıynsha bir balaǵa tabystyń 25 paıyzy, eki balaǵa 33 paıyzy, úsh jáne odan kóp balaǵa 50 paıyzy ustalady.

Eske salsaq, boryshkerlerdi jumyspen qamtý maqsatynda ótken jyly Jumyspen qamtý ortalyqtarymen birlesken bos jumys oryndary jármeńkesi 6 márte uıymdastyryldy. Onda jumysqa ornalasqan 617 boryshkerdiń 542-si alıment bereshegi bar azamattar bolǵany anyqtaldy.

Buǵan deıin Oralda alıment tólemegender sotqa tartylyp, 416 balanyń quqyǵy qorǵalǵanyn jazyp edik.