Infraqurylymynda problema bar turǵyn úı keshenderiniń jaǵdaıy qaraldy
ATYRAÝ. KAZINFORM —Atyraýda ınjenerlik ınfraqurylymynda problemasy bar 26 turǵyn úı kesheniniń máselesi jyl sońyna deıin sheshilýi tıis. Oblys ákimi Bolat Aqsholaqovtyń tóraǵalyǵymen ótken jıynda kóppáterli úılerdi aldaǵy kúzgi-qysqy maýsymǵa daıyndaý jáne problemaly nysandardy kommýnaldyq menshikke qabyldaý máseleleri qaraldy.
Oblys ákimi Bolat Aqsholaqov Atyraý qalasyndaǵy kóppáterli turǵyn úılerdi 2026–2027 jyldardaǵy kúzgi-qysqy maýsymǵa daıyndaý máseleleri jóninde jıyn ótkizdi. Qala ákiminiń mindetin ýaqytsha atqarýshy Meıirjan Muqasovtyń baıandamasynda 15 mamyrdan bastap kóppáterli turǵyn úılerdiń jylytý júıelerine gıdravlıkalyq synaqtar júrgizilip jatqany aıtyldy. Tekseriletin úıdiń jalpy sany — 1 174.
— 15 qyrkúıektegi jaǵdaı boıynsha 1 113 úı tekserildi, bul — 94,8%. Avtonomdy qazandyqtary bar 79 úıde jumys bólek júrip jatyr, júıelerdi jýý, qysymmen tekserý jáne baptaýǵa 27 servıstik uıym tartylǵan, — dedi M. Muqasov.
Sondaı-aq ınjenerlik ınfraqurylymynda problemalary bar 26 turǵyn úı keshenin kommýnaldyq menshikke berý máseleleri qaraldy. Nysandardaǵy jaǵdaı ártúrli. Keıbiriniń salǵan kompanııasy men qujattamasy bar, keıbirinde menshik ıesi joq nemese jeliler rásimdelmegen.
— Turǵyn úı keshenderin teńgerimge alý kezinde ilespe ınfraqurylymdardy birge tapsyryp, máselelerdi kelesi jyldarǵa qaldyrmaı, der kezinde sheshý qajet. Áıtpese turǵyndar qordalanǵan máselelermen betpe-bet keledi. Dál qazirgi basty mindet — kúzgi-qysqy maýsymnyń qalypty ótýin qamtamasyz etý. Jyl aıaǵyna deıin árbir nysan boıynsha naqty sheshim shyǵarylýy tıis, — dep atap ótti oblys ákimi.
Budan bólek, oblys ákiminiń qaladaǵy 17 turǵyn úı keshenindegi káriz ınfraqurylymynyń máselelerin sheshý jónindegi tapsyrmasy boıynsha ázirlengen jol kartasy qaraldy.
Bolat Aqsholaqov jıyndy qorytyndylaı kele, jol kartasynyń júzege asyrylýyn qamtamasyz etýdi, jyl aıaǵyna deıin problemaly turǵyn úı keshenderiniń ınfraqurylym máselelerin sheshýdi, keıin nysandardy teńgerimge qabyldaýdy, sondaı-aq ınjenerlik ınfraqurylym obektilerine jedel ári ýaqytyly qyzmet kórsetý úshin biryńǵaı kommýnaldyq kásiporyn qurý boıynsha usynystar ázirleýdi tapsyrdy.
