Atyraýda 25 jastaǵy jigit 34 iri qarany urlap, ıelerin 5 mln teńge shyǵynǵa batyrǵan

ATYRAÝ. KAZINFORM – Atyraý oblysynda 25 jastaǵy 14 márte urlyq jasap, 34 iri qarany jymqyrǵan. Sóıtip, mal ıelerine 5 mln teńge shyǵyn keltirgen.

Atyraý oblystyq polıtsııa departamentiniń málimetine súıensek, kúdikti Jylyoı aýdanyndyq polıtsııa bóliminiń qyzmetkerleri ustaǵan. 

– Jedel izdestirý is-sharasy kezinde mal urlyǵyna qatysy bar degen kúdikti ustady. Kúdikti – Qulsary qalasynyń 25 jastaǵy turǵyny. Buǵan deıin urlyq jasaǵany úshin qylmystyq jaýapkershilikke tartylǵan. Bastapqy tergeý barysynda kúdiktiniń maýsym-tamyz aılary aralyǵynda Jylyoı aýdanyndaǵy Aqkıiztoǵaı aýylynda 14 márte mal urlyǵyn jasap, 34 iri qarany jymqyrǵany anyqtaldy. Kúdiktiniń zańsyz áreketinen jábirlenýshilerge 5 mıllıon teńgeden astam shyǵyn keltirilgen, -dep habarlady departamenttiń baspasóz qyzmeti.

Ustalǵan kúdikti urlaǵan iri qarany satý úshin áleýmettik jelige habarlandyrý jarııalap otyrǵan. Urlanǵan maldy satyp alǵan turǵyndar da anyqtalǵan. 

– Tintý júrgizý kezinde kúdiktiniń mobıldi telefonynan urlanǵan maldyń fotosýretteri men satyp alýshylar arasyndaǵy jazbalar tabyldy. Kúdikti kinásin moıyndady. Qazir kúdikti qamaýǵa alyndy. Polıtsııa qyzmetkerleri qosymsha dálelder jınaý úshin telefon qońyraýlarynyń bıllıngisin tekserip jatyr. Mal urlyǵy qylmysqa basqa da adamdardyń qatysynyń bar-joǵyn tekserý qolǵa alyndy, -dep málim etti departamenttiń baspasóz qyzmeti. 

Qazir kúdiktige qatysty sotqa deıingi tergeý amaldary bastaldy. 

Eske sala ketelik, budan buryn 13 adamnyń malyn urlap, 6,9 mln teńge shyǵynǵa batyrǵan atyraýlyq 7 jylǵa sottalǵanyn jazǵan edik.