Atyraýda 22 jastaǵy boıjetkendi kólikke kúshtep mingizgen jigit qamaýǵa alyndy
ATYRAÝ. KAZINFORM – Atyraýda 22 jastaǵy jigit ózimen qurdas boıjetkendi kólikke kúshtep mingizgen. Kúdikke ilingen jigit ustalyp, qamaýǵa alyndy.
Bul týraly Telegram arnalardyń birinde vıdeo tarady. Keıin atalǵan derekti Atyraý oblystyq polıtsııa departamentiniń baspasóz qyzmeti rastady.
«Áleýmettik jelide taralǵan vıdeoǵa baılanysty avtokólikke áıeldi kúshtep mingizgen 22 jastaǵy er adam anyqtalyp, ustaldy. Avtokóligi arnaýly turaqqa qoıyldy. Kúdiktige usaq buzaqylyq babymen hattama toltyrylyp, qamaýǵa alyndy. Jınaqtalǵan is-qujattar sotqa joldanady, -dep habarlady departamenttiń baspasóz qyzmeti.
Alaıda atalǵan derekke baılanysty polıtsııaǵa 22 jastaǵy boıjetkennen shaǵym túspegen.
Eske sala ketelik, budan buryn Atyraýda jyl basynan beri zorlyq-zombylyq deregimen 30 qylmystyq is tirkelgenin habarlaǵan bolatynbyz.