Atyraýda 22 adamda sıfılıs anyqtaldy
ATYRAÝ.KAZINFORM - Atyraý oblysynda ótken jyly merezdiń 20 jaǵdaıy anyqtalsa, bıylǵy alǵashqy alty aıda-aq 22 adamda tirkeldi. Olardyń arasynda bir bala bar. Bul týraly Atyraý oblystyq teri-venerologııalyq dıspanseri málimdedi.
Merez — kóbine jynystyq jolmen juǵatyn qaýipti ınfektsııalyq aýrý. Ol terini, shyryshty qabattardy, ishki aǵzalar men júıke júıesin zaqymdaýy múmkin. Mamandardyń aıtýynsha, aýrýdyń alǵashqy belgileri adamda ártúrli baıqalady. Keıbir naýqastardyń denesinde bórtpe paıda bolyp, shashy túsýi múmkin. Al keı adamdarda aýrýdyń syrtqy belgileri múlde baıqalmaıdy. Soǵan qaramastan ınfektsııa aǵzaǵa enip, birtindep túrli múshelerge áser ete beredi.
- Merez aýrýynyń belgileri keı adamdarda kórinedi. Mysaly, ústine bórtpeler shyǵady, shashynyń túsýi baıqalady. Taǵy bir belgileri bolýy múmkin. Al keı adamdarda ondaı belgiler bolmaıdy. Biraq bakterııa túsken soń birtindep aǵzany búldire bastaıdy. Bul — juqpaly kezeńdegi aýrý, - dedi Atyraý oblystyq teri-venerologııalyq dıspanseriniń dırektory Mıra Berdesheva.
Dárigerler ınfektsııany erte anyqtaýdyń mańyzy zor ekenin aıtady. Sebebi aýrý der kezinde anyqtalyp, tıisti em qabyldanbasa, asqynýy múmkin. Sondyqtan kúmándi belgiler baıqalǵan jaǵdaıda medıtsınalyq tekserýden ótý qajet.
2021 jyly óńirde sıfılıstiń 72 jaǵdaı tirkelse, 2022 jyly — 55, 2023 jyly — 36, 2024 jyly 34 jaǵdaı anyqtalǵan. Mamandardyń aıtýynsha, aýrýdyń bul túriniń bir kezeńde taralý kórsetkishi tómendep, belgili bir ýaqyttan keıin artyp otyrady.
Buǵan deıin qaladaǵy mektepterde mıopııa kórsetkishi 30%-ǵa jetkenin jazǵan edik.
