Atyraýda 200 myń qyzǵaldaq búr jardy
ATYRAÝ. KAZINFORM – 30 jyldan astam ýaqyttan beri gúl satý bıznesimen aınalysatyn Baqyt Ishakova 2025 jyldyń sońynda jylyjaıǵa qyzǵaldaqtyń 12 túrinen 200 myń túp ekken. Kásipkerdiń sózinshe, óńirde osyǵan deıin mundaı kólemde qyzǵaldaq óspegen.
Birneshe jyl memlekettik qyzmette jumys istegen ol bul bızneske kezdeısoq kelgen. Jylyjaı salyp, gúl ósirý týraly oı kópten bolǵan. Degenmen kásipker eń aldymen ony satatyn dúkender ashýdy maqsat etti.
Onyń aıtýynsha, jyldan jylǵa gúldi ózge óńirler men shet memleketterden satyp alý qıyndaǵan. Keden, logıstıka syndy sebepter protsesti kúrdelendire bergennen keıin osy iske bel býyp, nyq senimmen kirisken.
— 2025 jyldyń kókteminde pııazshyq satyp aldyq. Ol Gollandııada saqtaýly turdy. Jeltoqsan aıynda óńirge jetkizip, egip bastadyq. 200 myń qyzǵaldaqty ózimizdiń dúkenderimizde satamyz. Bul salaǵa qyzyǵatyndardyń kóbi birinshi qyzǵaldaq egip alady da, satýǵa kelgende qınalyp qalady. Sodan soń qyzyǵýshylyǵy basylyp qalady. Al bizde satatyn oryndarymyz daıyn. Qala ishinde 11 dúkenimiz bar, — deıdi kásipker Baqyt Ishakova.
Osy jyly qys minezin kórsetkendikten gúlderdi jylyjaıda ósirý ońaı bolmaǵan. Qyzǵaldaq ósý úshin arnaıy oryndaǵy aýa temperatýrasy 14-16°C bolýy qajet. Budan jyly bolsa tez gúldep, boıy qysqa kúıinde qalady.
Qazir bul jumystyń basy-qasynda Baqyt Ishakovanyń uly men kelini júr. Olar qyzǵaldaqty gıdropondy jáshikke otyrǵyzǵan.
— Pııazshyqty arnaıy jáshikke ekkennen keıin salqyndatqyshqa jiberemiz. Ol jaqta 3 aptadaı tamyrlaný kerek. Odan soń jylyjaıǵa shyǵaryp, 2 apta 7 gradýstan az-azdan 14 gradýsqa deıin jylylyqty kóteremiz. Jeldetkish júıesi jaqsy bolýy qajet, -dedi Aıgerim Dáýletııarova.
Kásipker osy ýaqytqa deıin gúldiń bul túrin Gollandııa, Reseı, Belarýsten alyp kelgen. Ótken jyly qyzǵaldaqtyń danasyn 800 teńgeden satqan.
Endi bıyl otandyq ónimdi danasyn 700 teńgeden saýda-sattyqqa shyǵarmaq. Keler jyly qyzǵaldaqty kóbirek ósirip, batys óńirin tolyq qamtýdy josparlap otyr. Al bıyldan qaldyrmaı 11 500 pıon gúlin egýdi maqsat etip qoıǵan. Bul gúldi ósirýge 3 jyl ýaqyt kerek.
Buǵan deıin Almatynyń botanıkalyq baǵynda báısheshekter gúldegenin jazǵan edik.
