Atyraýda 200-ge jýyq shyrsha egildi
ATYRAÝ. KAZINFORM – Atyraý qalasynyń kóshelerine egý úshin 200-ge jýyq shyrsha jetkizildi. Shyrshanyń bıiktigi – 2 metr.
Atyraý qalalyq ákiminiń baspasóz hatshysy Ǵasyrbek Tólegenniń aıtýynsha, shyrshanyń kanadalyq jáne Glaýka túri Oral qalasynan jetkizilgen.
«Qylqan japyraqty aǵashtar Oral qalasyndaǵy baqta ósirilgen. Shyrshanyń bıiktigi shamamen 2 metr bolady. Shyrshalar Atyraýǵa túp-tamyrymen jetkizildi. Qalanyń sánin keltiretin kanadalyq jáne glaýka shyrshasy 4-5 metrge deıin ósedi. Qazir shyrshalar Q.Sátpaev dańǵylynyń boıyna, retrosaıabaq pen temirjol vokzalynyń aýmaǵyna otyrǵyzyldy. Bul jumys qala aýmaǵyn abattandyrý maqsatynda qolǵa alyndy», - deıdi Ǵasyrbek Tólegen.
Onyń aıtýynsha, aldaǵy ýaqytta shahar kóshelerine 300-ge jýyq qaıyń kóshetin egý josparlanyp otyr. Onyń keıbiri jergilikti baqtan alynady. Sondaı-aq, Reseı Federatsııasyndaǵy Tolıattı qalasynan ákelý josparlanǵan.
Eske sala ketelik, buǵan deıin Atyraýda Jaıyq ózeniniń ústindegi kópir oıylyp qalǵanyn habarlaǵan bolatynbyz.
Keıin Jaıyq ústindegi kópirdiń oıyǵy tún ishinde jóndelgenin jazǵan edik.
