Atyraýda 20 jyldan beri qaraýsyz qalǵan kanal aqyry jabylady

ATYRAÝ.KAZINFORM – Atyraýda 2000 jyldardyń basynda qazylǵan «Erik-Mostovoı» kanaly jańbyr men qar sýynyń tundyrǵysyna, al jazda shybyn-shirkeıdiń uıasyna aınaldy. Jergilikti atqarýshy organ araǵa ondaǵan jyl salyp, kanaldyń taǵdyryna núkte qoıdy.

Jýyrda Atyraý oblysynyń ákimi Serik Shápkenov uzyndyǵy 16 shaqyrymǵa sozylǵan kanal jabylyp, jańǵyrtylatynyn aıtty.

Bul jumysqa Atyraý qalalyq qurylys bólimi jaýapty. Jańǵyrtý jumysynyń jobasyn jasaýǵa bıýdjetten 112 mln teńge bólingen. Qazir jobaǵa túzetýler engizilip jatyr. Josparǵa sáıkes arnanyń tehnıkalyq jaǵdaıyn jaqsartý jáne sanıtarlyq qaýipsizdikti qamtamasyz etý maqsatynda kanal ishindegi las jáne turmystyq sý tazartylyp, kanal túbin jáne qabyrǵalaryn tazalaý, nyǵaıtý jáne gıdrooqshaýlaý jumysy júredi.

– Jobaǵa sáıkes kanaldiń ishine drenaj júıesi, sý qubyrlary, káriz júıesi, jazǵy sýarý júıesi tartylady. Arna boıyna birneshe káriz sorǵy stantsııasy salynyp, oǵan jınalǵan las sý «Kvadrat» býlaný alańyna aıdalady. Kanal aýmaǵyn abattandyrý jáne kógaldandyrý maqsatynda arnanyń beti tolyq jabylyp, jaıaý júrginshi, velosıped joly jáne júgirýge arnalǵan jolaq bolmaq. Sondaı-aq, oryndyqtar qoıylyp, jaryq shamdary ornatylady, - dep habarlady Atyraý qalasy ákimdigi.

2001-2002 jyldary Atyraý qalasynyń oń jaǵalaý bóligin abattandyrý úshin Mostovoı kanalyn qalpyna keltirý boıynsha «PII Atyraýavodproekt» JShS jobalaý ınstıtýty aýqymdy joba istedi. Bul jerde jasyl beldeý paıda bolyp, ózektiń ózi drenaj qyzmetin atqarady degen maqsat qoıylǵan edi. Sol kezde bıýdjetten kanal qurylysyna 1,5 mıllıard teńge jáne keıin qaıta jaraqtaýǵa, ıaǵnı júzbeli sorǵy stantsııasynyń qurylysy men shlıýzderdi ornatýǵa 170 mıllıon bólingen edi. Nysan qazir qaraýsyz jatyr.

Buǵan deıin máseleni jan-jaqty talqylaǵan qala turǵyndary kanaldy qurǵatyp, onyń ornyna jaıaý júrginshiler men velosıped jolaqtary bar demalys aımaǵyn qurý qajettigin usynǵan edi. Arna «Atyraý» shaǵyn aýdanynan bastalyp qala aýmaǵy arqyly Rakýsha jáne Erkinqala aýyldarynyń qıylysy tusynan Jaıyq ózenine qosylady.

Osyǵan deıin Jambylda Fýrmanov kanalynda 40 jylda alǵash jasalǵan mehanıkalyq tazalaý aıaqtalǵany jóninde jazǵan edik.