Atyraýda 20 kásiporyn 1,4 mln teńgege jýyq salyqty negizsiz tólegen

Atyraý oblysynda IV sanatqa jatatyn nysany bar 20 tabıǵat paıdalanýshy qorshaǵan ortaǵa teris áser etkeni úshin 1,4 mln teńgege jýyq salyqty tólegen. Biraq, bıýdjetke esepteý jáne tóleý salasyndaǵy monıtorıng qorytyndysymen salyqtyń negizsiz tólengeni anyqtalǵan, dep habarlaıdy Kazinform.

Sybaılas jemqorlyqqa qarsy is-qımyl agenttigi Atyraý oblystyq fılıalynyń baspasóz qyzmetinen málim etkendeı, óńirde IV sanattaǵy nysany bar 252 tabıǵat paıdalanýshy jumys isteıdi.

«Alaıda, QR Salyq jáne bıýdjetke tólenetin basqa da mindetti tólemder týraly kodeksine sáıkes, I, II jáne III sanattaǵy obektilerdiń operatorlary ǵana qorshaǵan ortaǵa teris áser etkeni úshin tólemaqy tóleýshiler qataryna jatady. Al, salyq salýdyń osy túri boıynsha IV sanattaǵy obektilerdiń operatorlary salyq tóleýshiler bolyp tabylmaıdy. Kásipkerlerdiń quqyqtary týraly tıisti túsindirý jumystarynyń bolmaýynan anyqtalǵan buzýshylyqtarǵa jol berilip otyr», - dep habarlady departamenttiń baspasóz qyzmeti.

Osyǵan baılanysty oblystyq departament monıtorıng qorytyndysymen kásipkerlerge tólemderdi qaıtarýdy júzege asyrý, sondaı-aq, nysanaly top arasynda túsinik berý jóninde usynys engizgen.

Sonyń nátıjesinde 10 kásipkerlik sýbektisine 653 myń 759 teńge keri qaıtarylǵan. Al, 3 sýbekt óz erkimen 710 myń 884 teńgeni qaıtarýdan bas tartqan.

Eske sala ketelik, buǵan deıin Atyraý munaı óńdeý zaýytynyń bıýdjetke tóleıtin salyǵy byltyrǵydan 1,5 esege artqanyn jazǵan edik.