Atyraýda 2 jasóspirimge qasaqana dene jaraqatyn salǵan kúdiktiler ustaldy
ATYRAÝ. KAZINFORM – Atyraýda bir top kúdikti 2 jasóspirimdi uryp, qasaqana dene jaraqatyn salǵan. Kúdiktiler ustalyp, polıtsııa bólimine jetkizildi.
Atyraý oblystyq polıtsııa departamentiniń baspasóz qyzmetinen málim etkendeı, oqıǵa munaıly shahar mańyndaǵy Erkinqala aýyldyq okrýginde bolǵan.
— Eki jasóspirimge qasaqana dene jaraqatyn salǵan barlyq kúdikti anyqtalyp, polıtsııa bólimine jetkizildi. Kúdiktilerdiń kámelet jasyna tolmaýyna baılanysty zańdy ókilderiniń qatysýymen jaýap alynady. Qazir atalǵan oqıǵaǵa baılanysty qylmystyq is tirkelip, keshendi tergeý amaldary júrgizilip jatyr. Ózge aqparat tergeý múddesine sáıkes jarııalaýǵa jatpaıdy, — dep habarlady departamenttiń baspasóz qyzmeti.
Jábirlenýshilerge sot-medıtsınalyq saraptamasy taǵaıyndaldy. Oqıǵanyń barlyq mán-jaıyn anyqtaý bastalǵan.
Eske sala ketelik, budan buryn Atyraýda 3 kún buryn Jaıyqqa batyp ketken bozbala tabylmaı jatqanyn habarlaǵan bolatynbyz.