Atyraýda 2 aıda 9 adam sýǵa ketti: Jaıyqty baqylaýǵa 5 dron tartyldy
ATYRAÝ. KAZINFORM – Shomylý maýsymy bastalǵaly beri Atyraý oblysynda 9 adam sýǵa ketip, kóz jumdy. Onyń ekeýi – bala. Qaýipsizdikti kúsheıtý úshin Jaıyq ózenindegi baqylaýǵa 5 dron tartylyp, reıdtik is-sharalar jalǵasyp jatyr.
Atyraý oblystyq tótenshe jaǵdaılar departamentiniń málimetinshe, mert bolǵandardyń bári ruqsat etilmegen jerge sýǵa túsken.
Atyraý oblysy ákimdiginiń ótken jyldyń jeltoqsan aıynda shyqqan qaýlysynda resmı jaǵajaı sany 11 bolýy tıis edi. Qutqarýshylar jaǵajaılardy, sý astyn tekserý kezinde talaptarǵa saı kelmegendikten tizimnen keıbiri alynǵan.
- Qala aýmaǵynda «Malıbý» jáne Jańatalap, Erkinqala, Almaly jáne Qaıyrshaqty aýylynda ornalasqan resmı jaǵajaılar jumys istep tur. Reıdtik sharalardan turǵyndar kóbine resmı jaǵajaıda emes, kópten bólektenip demalǵandy durys kóretinderin baıqadyq. ıAǵnı, olar resmı jaǵajaı mańynda júrse de, 200-300 metr qashyqtaý jerge jaıǵasady,-dep pikir bildirdi tótenshe jaǵdaılardy joıý basqarmasynyń basshysy Aıbek Quspanǵalıev.
Shomylý maýsymy bastalǵaly sý aıdyndarynda qaýipsizdik qaǵıdalaryn buzǵan nemese oryndamaǵan 92 azamatqa aıyppul salynǵan. Sonyń ishinde balalaryn qaraýsyz qaldyrǵan ata-analar da bar.
- Balalarǵa eskertý jasap, jiberip qoıatyn bolsaq, olar keri kelip sýǵa túsedi. Balalardyń arasynda sýǵa túsip bilmeıtin, alaıda ony aıtqysy kelmeıtin jaǵdaılar bolady.Munyń arty qaıǵyly oqıǵaǵa ulasýy múmkin,-dep tolyqtyrdy Aıbek Quspanǵalıev.
Óńirde aptap ystyqqa baılanysty reıdtik is-sharalar kúsheıtilgen. Bul jumysqa 80-ge jýyq qutqarýshy, polıtsııa qyzmetkerleri men eriktiler tartylǵan. Atyraý qalasynda sýdaǵy qaýipsizdikti qamtamasyz etý úshin 5 dron jumys isteýde.
Buǵan deıin Túrkistan oblysynda shomylý maýsymy bastalǵaly 17 adam sýǵa ketip kóz jumǵanyn jazǵan edik.
