Atyraýda 1950 jyly paıdalanýǵa berilgen stadıon taǵy rekonstrýktsııadan ótedi
ATYRAÝ. KAZINFORM – Atyraý qalasyndaǵy «Munaıshy» ortalyq stadıony 1950 jyly paıdalanýǵa berilgen. Endi ony taǵy da qaıta jańǵyrtýdan ótkizý josparlanyp otyr.
Atyraý oblystyq dene shynyqtyrý, sport jáne týrızm basqarmasynyń baspasóz hatshysy Gaýhar Ilıasovanyń deregine qaraǵanda, stadıon «Bokstan oblystyq mamandandyrylǵan sporttyq klýby» KMQK teńgerimine berilgen.
– Atyraý qalasyndaǵy tarıhı sport nysandarynyń biri – «Munaıshy» ortalyq stadıonyn qaıta jańǵyrtý 2025-2026 jyldary júrgiziledi. Jańa joba aıasynda stadıon ınfraqurylymyn zaman talabyna saı jańartý, sportshylar men kórermenderge qolaıly jaǵdaı jasaý kózdelip otyr. Qazir oblystyq qurylys, sáýlet jáne qala qurylysy basqarmasynyń tapsyrysymen stadıondy keshendi túrde qaıta jańartý maqsatynda jobalyq-smetalyq qujaty ázirlendi. Joba avtory – «KazahEnergoProm» JShS atalǵan qujatty memlekettik saraptamaǵa jiberdi, - deıdi Gaýhar Ilıasova.
«Munaıshy» stadıony 1950 jyly paıdalanýǵa berilgenimen, 2003 jyly tolyq rekonstrýktsııadan ótkizilgen. Al, 2023 jyly jóndeý júrgizilgen.
Eske sala ketelik, budan buryn Atyraý oblysynda fýtbol klýby men 2 iri nysan memleket menshigine qaıtarylǵanyn jazǵan bolatynbyz.