Atyraýda 19 jastaǵy qyzdy qorlap, áleýmettik jelige vıdeo jarııalaǵan jigit 30 kúnge qamaldy
ATYRAÝ. KAZINFORM — Atyraýda 19 jastaǵy qyzdy uryp-soǵyp, pyshaq jaraqatyn salǵan, keıin onyń vıdeosyn áleýmettik jelige jarııalaǵan jigitke qatysty qylmystyq is qozǵaldy. Aldyn ala málimetke sáıkes, oqıǵa 8 naýryz kúni tańerteń bolǵan. Kúdikti retinde 21 jastaǵy qala turǵyny ustalǵan.
Kúdikti birneshe saǵat qyzǵa qysym kórsetip, pyshaq jaraqatyn salyp, qorlaǵan. Sondaı-aq bolǵan jaıttyń bir bóligin áleýmettik jelidegi storıs pen Telegram messendjerinde jarııalaǵan. Zardap shekken qyzdyń denesi men aıaqtarynda kóp jaraqat bolǵan. Ol oblystyq aýrýhananyń jaraqat pýnktine jetkizilgen.
— Dárigerlerdiń tekserýi nátıjesinde naýqastyń aıaq-qoldary men bet aımaǵynda betkeı jaraqattary anyqtaldy. Medıtsınalyq qyzmetkerler tarapynan qajetti medıtsınalyq kómek kórsetildi. Jaǵdaıy qanaǵattanarlyq bolǵandyqtan, naýqas ambýlatorııalyq em qabyldaý úshin úıine jiberildi. Qyz dárigerlerdiń baqylaýynda, — dep málimdedi densaýlyq saqtaý basqarmasy.
Osy jaǵdaı boıynsha kúdiktige qatysty Qylmystyq kodekstiń 110-baby, ıaǵnı qınaý boıynsha qylmystyq is qozǵalǵan.
— Atalǵan derekke qatysty qylmystyq is tirkelip, keshendi tergeý amaldary júrgizilip jatyr. 21 jastaǵy kúdikti qamaýǵa alyndy. Keshendi tergeý amaldary jalǵasyp jatyr. Ózge aqparat tergeý múddesine sáıkes jarııalaýǵa jatpaıdy, — dedi oblystyq PD baspasóz hatshysy Meıirim Erdáýlet.
Atyraý qalasynyń ákimshilik quqyq buzýshylyqtar jónindegi mamandandyrylǵan soty ÁQBtKniń 440-1-babynyń 1-bóligi (esirtki, psıhotroptyq zattardy, sol tektesterdi, sondaı-aq kúshti áser etetin zattardy medıtsınalyq emes maqsatta tutyný) jáne 434-babynyń 2-bóligi boıynsha quqyq buzýshyǵa qatysty ákimshilik quqyq buzýshylyq týraly isterdi qarady.
2026 jylǵy 8 naýryzda azamat Atyraý qalasynda ustalyp, tekserý barysynda onyń medıtsınalyq emes maqsatta esirtki, atap aıtqanda «PVP» (alfa pırrolıdınopentıofenon), «TRM» (metabolıty tropıkamıda) qoldanǵany anyqtalǵan.
Sondaı-aq, ol ákimshilik jaza qoldanylǵannan keıin quqyq buzýshylyqty bir jyl ishinde qaıtalap, Atyraý oblystyq aýrýhanasynda bylapyt sóılep, aınalasyndaǵylarǵa qurmetsizdik kórsetip, qoǵamdyq tártipti buzǵan.
— Kúdiktiniń ákimshilik quqyq buzýshylyq jasaýdaǵy kinási ákimshilik quqyq buzýshylyq týraly hattamalarmen, saýal qoıý hattamalarymen, medıtsınalyq kýálandyrý qorytyndysymen jáne beınejazbalarmen tolyq dáleldendi. Sot qaýlysymen ol ÁQBtK-niń 440-1-babynyń 1-bóligimen, 434-babynyń 2-bóligi boıynsha kináli dep tanylyp, jasalǵan quqyq buzýshylyqtyń sıpaty, onyń jeke basy, onyń quqyq buzýshylyq jasaǵanǵa deıingi jáne odan keıingi minez-qulqy eskerile otyryp, oǵan ákimshilik jaza retinde 30 táýlik merzimge ákimshilik qamaqqa alý jazasy qoldanyldy, — dep habarlady oblystyq sottyń baspasóz qyzmeti.
Aıta keteıik, sot qaýlylary zańdy kúshine endi.
Buǵan deıin Shymkentte polıtseıdi urǵan jasóspirim jazalandy.
