Atyraýda 181 adam balalaryna alıment tóleýden jaltarǵandar esebinde tur

ATYRAÝ. KAZINFORM – Atyraý oblysynda jyl basynan beri 181 adam balaryna alıment tóleýden jaltarǵandardyń esebine alynǵan.

Atyraý qalalyq polıtsııa basqarmasy kóshi-qon bóliminiń ınspektory, polıtsııa leıtenanty Rımma Sıdıhovanyń aıtýynsha, kámeletke tolmaǵan balalaryna alıment tóleýden jaltarǵandar memlekettik organdar men sot oryndaýshylarynyń esebinde tur.

«Ýchaskelik polıtsııa qyzmetkerleri sot oryndaýshylarymen birge alıment tóleýden jaltarǵandardy, boryshkerler men týysqandarymen qarym-qatynasyn úzgenderdi udaıy izdestiredi. Máselen, bıyl jyl basynan beri alıment tóleýden jaltarǵany úshin 181 adam memlekettik organdardyń, sot oryndaýshylarynyń esebine alyndy. Al, kóshi-qon bólimi arqyly alıment tóleýden jaltaryp júrgen 26, boryshker sanatyndaǵy 25 jáne týysqandarymen qarym-qatynasyn úzgen 7 adam izdestirý esebinde tur», -deıdi Rımma Sıdıhova.

Onyń deregine súıensek, boryshkerlerdi izdestirýge baılanysty reıdtiń alǵashqy kúninde 10 adam anyqtalǵan. Onyń ishinde alıment tólemegen 8, ózge qaryzyn ótemegen 2 boryshker bar.

«Reıdtik is-shara kezinde kámelet jasyna tolmaǵan balalaryn baǵyp-qaǵý mindetin oryndamaı, alıment tóleýden jaltarǵan er adam ustaldy. Onyń qaryzy shamamen 2 mln teńgege jýyq somany quraıdy. Taǵy bir atyraýlyq turǵynnyń 2017 jyldan beri balasyna alıment tóleý mindetin oryndamaı kelgeni anyqtaldy. Ol alımentke bereshegin óteýden bas tartyp, bala aldyndaǵy jaýapkershilikten jaltarǵan», -dedi Rımma Sıdıhova.

Eske sala ketelik, buǵan deıin Atyraý oblysynda 48 boryshker áıel balalaryna alıment tólemegenin jazǵan bolatynbyz.

Sondaı-aq, balalaryna alıment tólemegen boryshkerler qamaýǵa alynǵan edi.