Atyraýda 18 jastaǵy turǵyn dinı alaýyzdyqqa shaqyratyn kitaptar taratqan

ATYRAÝ. KAZINFORM – Atyraý oblysynda tyıym salynǵan dinı materıaldardy taratqan 18 jastaǵy turǵyn ustaldy. Kúdiktiden dinı alaýyzdyqqa shaqyratyn dinı kitaptar tárkilendi.

Atyraý oblystyq polıtsııa departamentiniń baspasóz qyzmetinen málimet etkendeı, Atyraý jáne Aqtóbe oblystaryndaǵy ekstremızmge qarsy is-qımyl bólinisteriniń qyzmetkerleri birlesken jedel izdestirý is-sharasyn júrgizgen. Sol kezde kúdiktiniń áleýmettik jelide dinı alaýyzdyqqa shaqyratyn, tyıym salynǵan dinı materıaldardy taratýmen aınalysqany anyqtalǵan. 

«Atyraý oblysynyń 18 jastaǵy turǵyny ustaldy. Kúdiktiniń ýaqytsha meken-jaıyna tintý júrgizý kezinde túrli dinı kitaptar, dinı mátini bar broshıýra sekildi aıǵaq zattar tárkilendi. Qazir kúdiktige qatysty qoǵamdyq nemese dinı birlestiktiń ne ózge de uıymnyń ekstremızmdi nemese terrorızmdi júzege asyrýyna baılanysty olardyń qyzmetine sottyń tyıym salý nemese taratý týraly sheshiminen keıin olardyń qyzmetin uıymdastyrý jáne oǵan qatysý deregimen qylmystyq is qozǵaldy», -dep habarlady polıtsııa departamentiniń baspasóz qyzmeti.

Eske sala ketelik, budan buryn áleýmettik jelide dinı mazmundaǵy sýret júktegen Atyraý turǵynyna aıyppul salynǵanyn habarlaǵan edik.