Atyraýda 17 jastaǵy jigittiń ólimine qatysy bar adamdarǵa shyqqan úkim ózgerissiz qaldy
ATYRAÝ.KAZINFORM – Atyraýda 17 jastaǵy jigittiń ólimine qatysy bar 13 aıyptalýshyǵa shyqqan úkim ózgerissiz qaldy.
Qandy oqıǵa 2024 jyldyń 19 qańtary túni Jylyoı aýdanynyń ortalyǵy Qulsary qalasynda bolǵan.
Eldar Amanbek pen onyń dostary týǵan kúnnen qaıtyp kele jatady. Tańǵy tórt shamasynda kólikte otyrǵan olarǵa belgisiz adamdar kelip, soqqyǵa jyǵady.
Eldar Amanbektiń anasynyń sózinshe, 17 jastaǵy balasy oqıǵa ornynda qaza bolady. Onyń ólimine tizesine salynǵan pyshaq jaraqaty sebep bolǵan. Kelispeýshilik barysynda basqa da balalar jaraqattanady.
Keıin osy oqıǵaǵa baılanysty kúdiktilerge qatysty adam ólimine ákep soqqan densaýlyqqa qasaqana aýyr zııan keltirý, sondaı-aq buzaqylyq baptarymen qylmystyq is qozǵaldy. Sot organymen 4 kúdikti bultartpaý sharasymen qamaýǵa, 7 kúdikti úıqamaqqa alynǵan edi.
2025 jyldyń 10 qazanynda bul iske núkte qoıyldy. Sottyń sheshimimen 10 jigittiń ártúrli merzimge bas bostandyǵy shektelse, 3 aıyptalýshy 6 jyl 8 aıǵa, 6 jylǵa jáne 4 jyl 6 aıǵa bas bostandyǵynan aıyryldy.
Búgin jábirlenýshi men aıyptalýshy taraptyń appelıatsııalyq shaǵymy Atyraý oblystyq sotynyń qylmystyq ister jónindegi sot alqasynda qaraldy.
Jábirlenýshi tarap sottalǵandardyń áreketterin qylmystyq kodekstiń 99 babynyń 2-bóliginde kózdelgen qylmys quramy bar dep eseptep, sot úkiminiń kúshin joıyp, isti prokýrorǵa qaıtarýdy suraǵan. Al qorǵaýshylar kináli dep tanylǵan 3 azamattyń birin aqtaýdy, qalǵandarynyń jazasyn jeńildetýdi suraǵan. Prokýror jábirlenýshi jáne qorǵaý taraptarynyń apellıatsııalyq shaǵymdaryn qanaǵattandyrýsyz qaldyrýdy surady.
Sot alqasy qos taraptyń shaǵymyn negizsiz dep tapty.
- Іs boıynsha Nurhatuly jábirlenýshi Amanbekke aýyr dene jaraqatyn salǵan. Tizesiniń artqy jaǵynan pyshaqpen jaraqattaǵan. Arterııalyq qan tamyry zaqymdalyp, jábirlenýshi qaıtys bolǵan. Osy jaraqat naqty Nurhatulynyń áreketinen týyndaǵany anyqtalyp otyr . Basqa sottalǵandardyń basym kópshiliginiń áreketi buzaqylyq, ıaǵnı QR Qylmystyq kodeksiniń 293 babynyń 2 nemese 3 bóligimen saralanǵan. Atalǵan appelıatsııalyq shaǵymdy sot alqasy negizsiz dep esepteıdi. Birinshi saty sotymen istiń mán-jaıy tolyq zerttelgen. Jábirlenýshiler, kýálardyń jaýaptarymen jáne sot saraptama qorytyndylarmen sottalǵandardyń úkiminiń sıpattaý bóliginde kórsetilgen qylmystardy jasaǵany aıqyndalǵan,-dedi Atyraý oblystyq sotynyń qylmystyq ister jónindegi sot alqasynyń tóraǵasy Tátti Ýalıeva.
Erteń, 24 aqpan kúni saǵat 15:00-de sot alqasy ıAna Legkodımovanyń ólimine qatysty aıyptalýshy taraptyń appelıatsııalyq shaǵymyn qaraıdy.