Atyraýda 167 adam aǵza transplantatsııasyn kútip otyr
ATYRAÝ.KAZINFORM - Atyraý oblysynda 167 adam aǵza aýystyrý úshin kezekte tur. Onyń 8-i – bala. Naýqastardyń basym bóligi búırek transplantatsııasyna muqtaj.
Óńirde 152 adam búırek jetkiliksizdigi boıynsha esepte tur. Budan bólek, júrek, ókpe jáne kóz sekildi aǵzalardy aýystyrýdy qajet etetin naýqastar bar.
Solardyń biri – Atyraý qalasynyń turǵyny Asylaı Zekenova. Oǵan úsh jyl buryn búırek jetkiliksizdigi dıagnozy qoıylǵan. Sodan beri dıalız ortalyǵynda em alyp keledi. Al búırek transplantatsııasyna kezekke turǵanyna bir jyl bolǵan.
Asylaı Zekenovanyń aıtýynsha, elimizde transplantatsııaǵa muqtaj adamdar kóp bolǵanymen, donor tapshylyǵy máselesi áli de ózekti.
- Sheteldik klınıkalarǵa qaraǵanda bizde bul úderis báseń. Bizdegi túsinik basqasha. Qaıtys bolǵan adamnyń aǵzasyn alý qıyn. Bul jerde din máselesi de bar. Eshkim óziniń jaqyn týysyn aǵzasyn alýǵa bere salǵysy kelmeıdi. Biraq men sııaqty aǵzaǵa muqtaj adam elde kóp, – deıdi Asylaı Zekenova.
Mamandardyń aıtýynsha, máıit donorlyǵyna qatysty basty máseleniń biri – marqumnyń týystarynan kelisim alý.
Atyraý oblysy boıynsha transplantatsııa koordınatory Dáýlen Eleýovtiń sózinshe, adamnyń mı ólimi rastalyp, qajetti medıtsınalyq tekserýler júrgizilgennen keıin ǵana týystarymen sóılesý bastalady.
- Bas-mı ólimi bolǵannan keıin, tekseristen ótken soń ǵana maǵan habarlasady. Sodan keıin aǵaıyndarymen sóılesip, máıitti donor etýge ruqsat suraımyn. Bıyl mundaı jaǵdaı tórteý boldy. Biraq onyń eshqaısysynda týystary ruqsat bergen joq, – deıdi Dáýlen Eleýov.
Sońǵy jyldary Qazaqstanda transplantatsııa sany artty. 2023 jyly 236 operatsııa jasalsa, 2024 jyly — 260, 2025 jyly — 310 operatsııa júrgizildi. 2026 jyldyń alǵashqy jartyjyldyǵynda taǵy 150 transplantatsııa jasaldy, onyń 30-y qaıtys bolǵan donorlardan alynǵan aǵzalar arqyly oryndaldy.
