Atyraýda 16 jastaǵy qyz otadan keıin kóz jumdy
ATYRAÝ. KAZINFORM — Atyraýda 16 jastaǵy qyz bala aýrýhanada qaıtys boldy. Ol tamyz aıynyń ortasynda oblystyq balalar aýrýhanasyna túsip, murnyna ota jasatqan.
Operatsııa 19 tamyz kúni jasalǵan. Otadan keıin jasóspirimniń jaǵdaıy kúrt nasharlaǵan. Oǵan shuǵyl jáne qarqyndy emdeý sharalary júrgizilip, beıindi mamandar men respýblıkalyq deńgeıdegi sarapshylardyń konsýltatsııalary uıymdastyrylǵan.
— Atalǵan operatsııa tehnıkalyq turǵydan kúrdeli ári joǵary dáldikti talap etetin hırýrgııalyq aralasýlardyń qataryna jatady. Mundaı operatsııalar barysynda jáne operatsııadan keıingi kezeńde medıtsınalyq tájirıbede belgili bir qaýipter men asqynýlardyń týyndaý yqtımaldyǵy tolyqtaı joqqa shyǵarylmaıdy, -dep túsindirdi oblystyq densaýlyq saqtaý basqarmasy.
Jasóspirim 7 qyrkúıek kúni kóz jumǵan. Qazir oqıǵanyń mán-jaıy, medıtsınalyq kómektiń der kezinde kórsetilgen-kórsetilmegeni jáne onyń sapasy, sondaı-aq týyndaǵan asqynýlardyń sebepteri jan-jaqty zerdelenip jatyr.
— Tekserý jáne saraptama jumysy tolyq aıaqtalǵanǵa deıin qandaı da bir aldyn ala qorytyndy jasaýǵa negiz joq. Patsıentke qatysty egjeı-tegjeıli medıtsınalyq aqparat dárigerlik qupııany jáne derbes derekterdi qorǵaý talaptaryna sáıkes jarııa etilmeıdi, — dep tolyqtyrdy densaýlyq saqtaý basqarmasy.
Buǵan deıin Oralda tok soqqan 10 jastaǵy bala kóz jumǵanyn jazǵan edik.
