Atyraýda 16 myń tonnaǵa jýyq balyq aýlaý lımıti belgilendi

ATYRAÝ. KAZINFORM – Atyraý oblysynda bıyl balyq aýlaý lımıti 16 myń tonnaǵa jýyqtady. Kóktemgi maýsym bastalǵaly beri Jaıyq ózeninde balyqshylar aýyna kókserke kóptep túsip jatyr.

19 naýryzdan bastap óńirde 10 kásiporyn Jaıyq ózeniniń boıyndaǵy 11 tartymda balyq aýlaýǵa kiristi. Ár ýchaskede 15-20 adamnan quralǵan balyqshylar toby sý marjandaryn aýlap, tsehterge ótkizip jatyr. Olardyń aıtýynsha, sońǵy jyldary sırek kezdesken kókserke ótken jyldan beri qaıta baıqala bastaǵan.

– Byltyrdan bastap kókserke kórindi. Halyqtyń rızyǵy bolar. Ólshemge tolmaıtynyn almaımyz, talapqa saı keletinin ǵana alamyz. Buryn bul balyq múlde bolmaıtyn, – deıdi balyqshy Batı-han Sultanǵalıev.

Degenmen balyqshylar sý deńgeıiniń tómendigine alańdap otyrǵanyn jasyrmaıdy.

– Burynǵydaı sý joq. Kúzden bastap balyq birtindep kórine bastady. Endi sáýirde sý keledi dep kútip otyrmyz. Qansha aýlasaq, sony tapsyramyz. Qyzyl balyq ázirge shyqqan joq, – deıdi balyqshy Sıraj Kenesarıev.

Mamandardyń málimetinshe, kóktemgi balyq aýlaý maýsymy 19 naýryz ben 15 mamyr aralyǵynda ótedi. Belgilengen talapqa sáıkes, 19 naýryzdan 15 sáýirge deıin balyqshylar 5 kún aý salyp, 3 kún úzilis jasaýy tıis. Al 15 sáýirden 15 mamyrǵa deıin 5 kún jumys istep, 5 kún demalady. Bul shekteýler balyqtardyń ýyldyryq shashýyna jaǵdaı jasaý úshin engizilgen.

– Jaıyq ózenine bólingen lımıttiń bir apta ishinde 5 paıyzy oryndaldy. Balyq aýlaý barysyn 15-ke jýyq ınspektor baqylap otyr. Olar tańerteńnen keshke deıin aýlanǵan ónimniń lımıtten aspaýyn qadaǵalaıdy, – dedi Damby balyq ınspektsııasy bóliminiń bas mamany Amangeldi Ahtanov.

Atyraý oblysy boıynsha balyq aýlaý lımıti birneshe sý aıdynyna bólingen.

– Jaıyq ózeninde – 2878 tonna, Qıǵash ózeninde – 3612 tonna, al Kaspıı teńiziniń oblys aýmaǵyndaǵy bóliginde 9447 tonna kvota qarastyrylǵan. Bul jumyspen 16 balyq sharýashylyǵy sýbektisi aınalysady,-dep málimdedi Jaıyq-Kaspıı oblysaralyq basseındik balyq sharýashylyǵy ınspektsııasy.

Aıta keteıik, ótken jyly oblysta 10 326 tonna kvota bólinip, nátıjesinde 9 myń tonnadan asa balyq aýlanǵan.

Buǵan deıin Aral-Syrdarııa basseıninde balyq aýlaýǵa shekteý qoıylǵanyn jazǵan edik.