Atyraýda 15 mln teńgeni ıemdendi dep ustalǵan kelinshek emizýli balasy bolǵany úshin úıqamaqqa shyqty

Atyraý polıtseıleri alaıaqtyqpen asa iri mólsherde aqsha ıemdendi degen kúdikpen 1990 jylǵy áıeldi ustady. Bastapqyda kúdikti ýaqytsha ustaý ızolıatoryna qamalǵan. Keıin emizýli balasy bary anyqtalyp, eki aıǵa úıqamaqqa jiberildi, dep habarlaıdy Kazinform.

Atyraý qalalyq polıtsııa basqarmasynyń bastyǵy, polıtsııa polkovnıgi Quttybaı Sadyqovtyń aıtýynsha, kúdikti kóbeıtip beremin degen jeleýmen birneshe jábirlenýshiden aqsha alǵan.

Kúdiktiniń bul áreketinen jábirlenýshilerge 15 mln teńgege jýyq materıaldyq shyǵyn kelgen.

Sol sebepten prokýratýranyń qoldaýymen aýdanaralyq tergeý sotyna bultartpaý sharasyn sanktsııalaý týraly ótinish berilgen.

Kúdikti QR Qylmystyq-protsestik kodeksiniń 128-babyna sáıkes ýaqytsha ustaý ızolıatoryna qamaýǵa alynǵan.

«Alaıda, áleýmettik jeli qoldanýshylary polıtsııa basqarmasynyń qyzmetkerleri atalǵan azamatshany zańsyz qamady degen aqparat taratty. Bul aqparat shyndyqqa sáıkes kelmeıdi. Óıtkeni, polıtseıler zań sheńberinde áreket etti. Týystary kúdiktiniń omyraýdaǵy balasyn basqarmaǵa ákeldi. Іshki ister mınıstrliginiń 2018 jyldyń 5 aqpanyndaǵy № 95 buıryǵynda 3 jasqa deıingi balany anasynan aıyrmaý maqsaty kózdelgen. Soǵan baılanysty bala anasyna berildi», -dep málim etti Quttybaı Sadyqov.

Onyń málimetine súıensek, búgin, 6 jeltoqsanda tergeý sotynyń sheshimimen kúdiktiniń jazasy ózgergen.

Endi kúdikti áıel ýaqytsha abaqtydan bosatylyp, 2 aı merzimge úıqamaqqa jiberildi.

Eske sala ketelik, buǵan deıin qarjy pıramıdasyn qurǵan atyraýlyq qarııa jazasyn shartty túrde óteıtinin jazǵan bolatynbyz.