Atyraýda 15 jasar qyzǵa zábir kórsetken kúıeýi 2,5 jylǵa sottaldy

ATYRAÝ. KAZINFORM – Atyraýda 15 jasar qyz turmysqa zorlyqpen shyǵyp, kúıeýinen zábir kórgen edi. Osy derekke baılanysty kúdikke ilingen kúıeýi 2 jyl 6 aıǵa bas bostandyǵynan aıyryldy.

Ótken jyldyń qyrkúıeginde 15 jasar qyzdyń zorlyqpen kúıeýge shyqqany jóninde aqparat tarady. Sol kezde oblystyq polıtsııa departamentiniń baspasóz qyzmeti atalǵan derekke qatysty qylmystyq is tirkelgenin habarlaǵan edi. 

– Alaıda alǵashqy tergeý kezinde jábirlenýshi tarap qylmys quramyn tolyqqandy tergeý úshin tıisti sot-medıtsınalyq, psıhıatrııalyq saraptamalarynan ótýden bas tartty. Osylaısha, keshendi tergeý áreketin júrgizýge kedergi keltirdi. Áleýmettik jelide taralǵan málimetter boıynsha tergeý jańǵyrtylady. Tekserý júrgiziledi, - dep málim etken bolatyn departamenttiń baspasóz qyzmetinen. 

Keıin ózin Móldir Amandyq dep tanystyrǵan qyzdyń vıdeosy «Prezıdentke hat» telegram arnasynda júkteldi. Onyń sózinshe, oǵan kúıeýi qysym kórsetip, qorqytyp, erkinen tys málimdeme jasatyp, telefonyn syndyryp tastaǵan. 

«Men Instagramdaǵy jazbany ketirý úshin úndeý jasaǵan bolatynmyn. Alaıda mán-jaıdyń astaryn eshkim bilmeıdi. Mine, búgin bar kúsh-jigerimdi jınap, sizderge qaıtadan úndeý jasap otyrmyn. Ne úshin? Sebebi, sol jazba salynǵannan keıin kúıeýimniń ákesi, organda isteıtin qaıyn aǵam kelip, alyp ketti. Olar maǵan bárin ózderiniń aıtýymen ǵana istetti. Óz erkimmen eshteńeni jasaǵan joqpyn. Komıssııa kelip teksergende de, komıssııa kelmes buryn da maǵan «osylaı sóıle» dep buıyrdy. Qorqytyp, meni májbúrledi. Álgi sózdi óz erkimmen aıtpadym. Aldap, tastap ketti. Endi mende basqa amal joq. Anam qaterli isikpen aýyrǵan soń, júrýge shamasy joq, kúnnen kúnge álsirep barady. Komıssııa sheshimin alyp, prokýratýradan osy isti qaıta qaraýdy suraıyn desek, oǵan maǵan demeý bolatyn ákem de, anam da sharasyz bolyp otyr», - degen edi Móldir Amandyq. 

Jaqynda osy istiń mán-jaıyn bilý úshin oblystyq polıtsııa departamentiniń baspasóz qyzmetine habarlasqan edik. 

– Atalǵan derek boıynsha tergelgen qylmystyq is 2024 jyldyń 24 qarashasy kúni sotqa joldandy. Kúdikti sot sheshimimen 2 jyl 6 aı merzimge bas bostandyǵynan aıyryldy, - dep málim etti departamenttiń baspasóz qyzmeti.

Al Atyraý oblystyq sotynyń baspasóz qyzmetinen málim etkendeı, atalǵan qylmystyq is jabyq kúıde qaralǵan. 

Eske sala ketelik, byltyr Atyraýda 15 jasar qyzdy turmysqa bergeni týraly aqparat taraǵanyn habarlaǵan bolatynbyz. 

Budan soń zorlyqqa ushyraǵan qyzdyń kómek suraǵanyn jazǵan edik.